دبئی۔3مئی(سیاست ڈاٹ کام)وبائی مرض کورونا سے نجات کیلئے دنیا بھر میں احتیاطی تدابیر اختیار کی جارہی ہیں اور بعض ممالک میں احتیاطی تدابیر پر سختی سے عمل کررہے ہیں جن میں خلیجی ممالک سرفہرست ہیں۔خلیجی تعاون کونسل میں شامل ممالک نئے کورونا وائرس کا مقابلہ قرنطینہ اور سماجی فاصلے کے ضابطے کی پابندی کرکے پوری قوت سے کررہے ہیں۔ گوگل کے جاری کردہ اعدادوشمار کے مطابق معاشی ضروریات کی تکمیل کے لیے گھروں سے نکلنے کی آزادی کے باوجود پوری دنیا میں قرنطینہ اور سماجی فاصلے کی پابندی میں سرفہرست خلیجی ممالک ہی ہیں۔ خلیجی ممالک میں سعودی عرب، متحدہ عرب امارات، کویت، سلطنت عمان اور بحرین کو سماجی فاصلہ رکھنے والے ممالک میں سرفہرست شمار کیا گیا۔عوامی مقامات پر آمدورفت میں کمی کے حوالے سے بحرین پوری دنیا میں پانچویں نمبر پر ہے. جہاں سڑکوں پر نقل و حرکت میں 31 فیصد کمی ریکارڈ کی گئی۔ بحرین کا نمبر جنوبی کوریا، جاپان، امریکہ اور سنگاپور کے بعد ہے۔گوگل ہر ملک میں رونما ہونے والی تبدیلی سے متعلق سہ ماہی اعدادوشمار کی تجزیاتی رپورٹ پیش کررہا ہے۔ سال کے ابتدائی تین ماہ کے دوران خلیجی ممالک میں تفریحی مقامات، جنرل اسٹورز اور شاپنگ سینٹرز وغیرہ میں نقل وحرکت میں غیرمعمولی کمی ریکارڈ کی گئی۔بحرین میں نقل و حرکت 21.2 فیصد، کویت میں 36.3 فیصد، سلطنت عمان میں 37.8 فیصد، سعودی عرب میں 38.5 فیصد اور متحدہ عرب امارات میں 42.33 فیصد کمی ریکارڈ کی گئی۔پبلک ٹرانسپورٹ اور ریٹیل کے شعبوں میں اوسط کمی 60 فیصد سے لے کر 53.2 فیصد ریکارڈ کی گئی۔بحرین سینٹر فار سٹراٹیجک سٹڈیز کے ڈائریکٹر ڈاکٹر عمر العبیدلی نے کہا کہ کورونا کی وبا کے انسداد کے دوران صحت اور اقتصادی اہداف میں توازن پیدا کرنا بے حد مشکل مرحلہ ہے۔