شدید ترین طوفان کے طورپر ’یاس ‘کی پیشقدمی
نئی دہلی : گردابی طوفان ‘یاس’ شمال۔ شمال مغرب کی جانب بڑھتے ہوئے اگلے 12 گھنٹوں کے دوران خطرناک گردابی طوفان میں تبدیل ہوسکتا ہے ۔ ہندوستان کے محکمہ موسمیات نے منگل روزیہ اطلاع دی۔محکمہ موسمیات نے ایک بیان جاری کیا ہے کہ گردابی طوفان شمال مغرب کی طرف بڑھے گا اور پھر تیزرفتارسے چہارشنبہ کی صبح شمالی اڈیشہ اور مغربی بنگال کے ساحلوں کے نزدیک شمال خلیج بنگال میں پہنچے گا۔ مشرقی وسطی اور متصل مغربی وسطی خلیج بنگال پربنے ہوئے شدید سمندری طوفان یاس نے مغربی وسطی خلیج بنگال کی سمت پیشقدمی کی ہے ۔گذشتہ 6گھنٹوں کے دوران 17کیلومیٹرفی گھنٹہ کی رفتار سے اس کی پیشقدمی ہوئی ہے ۔یہ طوفان شمال۔شمال مغربی سمت سے ہوتے ہوئے آئندہ 12گھنٹوں کے دوران شدید ترین سمندری طوفان میں تبدیل ہوگا۔اسی دن تقریباََ دوپہر کو خطرناک گردابی طوفان کی شکل میں پارا دیپ اور سمندری جزائر کے درمیان شمال اڈیشہ ۔مغربی بنگال کے ساحلوں کو عبور کرنے کا امکان ہے۔ مرکزی وزیر داخلہ امیت شاہ نے پیر کے روز اڈیشہ ، مغربی بنگال اور آندھرا پردیش کے وزرائے اعلی اور انڈومان اور نکوبار کے لیفٹیننٹ گورنر سے سبھی کووڈ 19 کے تمام اسپتالوں ، لیبارٹریوں ، ویکسین کولڈ چینز اور دیگرطبی مراکز میں پاور بیک اپ کے مناسب انتظامات کر کے طوفان سے نمٹنے کے لئے تیاریاں کرنے کی ہدایت دی ۔
