بہار سرکاری تقریب میں توہین آمیز واقعہ کیخلاف نظام آباد خواتین کی کلکٹر کو یادداشت
نظام آباد۔ 23 ڈسمبر (سیاست ڈسٹرکٹ نیوز) جماعت اسلامی ہند شہر نظام آباد کی جانب سے شعبہ خواتین کے ذمہ داران و اراکین کے ہمراہ آج ضلع کلکٹر نظام آباد کے دفتر ایک تحریری یاداشت پیش کی گئی۔ جس میں بہار میں سرکاری تقریب کے دوران ایک مسلم خاتون ڈاکٹر کے ساتھ جو غیر شائستہ اور توہین آمیز عمل ہوا، وہ نہ صرف ایک خاتون کی عزت کے خلاف تھا بلکہ اس کی مذہبی آزادی اور جسمانی خودمختاری کی بھی خلاف ورزی تھی۔ ضلع کلکٹر سے مطالبہ کیا گیا کہ انتظامیہ اس واقعہ کاسختی سے نوٹ لے اور اسے اعلیٰ حکام تک پہونچائے۔ بشمول گورنر تلنگانہ و بہار،نیشنل کمیشن فار ویمن، بہار اسٹیٹ کمیشن فار ویمن، نیشنل ہیومن رائٹس کمیشن اور صدر جمہوریہ تک بھیجا جائے۔ یادداشت پیش کرنے کے دوران شہر نظام آباد کی چاروں جماعتوں سے تعلق رکھنے والی خواتین کی نمائندگان بھی موجود تھیں، تاکہ یہ واضح کیا جا سکے کہ یہ مسئلہ کسی سیاسی اختلاف کا نہیں بلکہ خواتین کی عزت، انسانی وقار اور آئینی حقوق کا ہے۔جماعت اسلامی ہند، نظام آباد ضلع کے نمائندگان نے انتظامیہ سے درخواست کی ہے کہ ایسے واقعات کی روک تھام کے لیے اقدامات کیے جائیں اور عوام میں یہ پیغام جائے کہ کوئی بھی خاتون، اس کے مذہب یا لباس سے قطع نظر، عوامی مقام پر توہین برداشت نہیں کرے گی۔واضح رہے کہ جماعت اسلامی ہندکے ذمہ داران جناب عبدالستار خان امجد (یعقوب پورہ)، جناب عبدالرحیم (احمدپورہ)،جناب شیخ حسین و دیگر نے خواتین کے اس وفد کی قیادت کی۔