نئی دہلی: راجیہ سبھا نے جمعرات کو ‘ناری شکتی وندن بل’ کو منظوری دے دی، جس میں پارلیمنٹ کے ایوان زیریں اور ریاستی اسمبلیوں میں خواتین کے لئے 33 فیصد نشستیں محفوظ رکھنے کا انتظام ہے۔ بل کی منظوری کے وقت وزیر اعظم نریندر مودی ایوان بالا میں موجود تھے۔ راجیہ سبھا میں خواتین ریزرویشن بل کے حق میں 215 ووٹ ڈالے گئے جب کہ مخالفت میں ایک ووٹ بھی نہیں پڑا۔اس سے ایک دن پہلے بدھ کو خواتین ریزرویشن بل کو لوک سبھا میں دو تہائی اکثریت سے منظور کیا گیا تھا۔ ناری شکتی وندن بل کے قانون بننے کے بعد 543 رکنی لوک سبھا میں خواتین ارکان کی تعداد موجودہ 82 سے بڑھ کر 181 ہو جائے گی۔ ریاستی اسمبلیوں میں بھی خواتین کے لئے 33 فیصد نشستیں مختص کی جائیں گی۔
