ممبئی، 21 ستمبر (ایجنسیز) بالی ووڈ کی معروف اداکارہ کرینہ کپور خان اپنی 45 ویں سالگرہ منارہی ہیں۔ بالی ووڈ کی بے بو کے لقب سے مشہور کرینہ کپور کی سالگرہ کے موقع پر ساتھی اداکاروں کی جانب سے انھیں مبارکباد دی جارہی ہے۔ کرینہ کپور بالی ووڈ کے مشہور اداکار سیف علی خان سے 2012 میں رشتہ ازدواج میں بندھی تھی۔ کپور فیملی سے تعلق رکھنے والی کرینہ لجنڈ اداکارراج کپور کی پوتی ہیں۔ میڈیا کی رپورٹ کے مطابق کرینہ کپور کی مجموعی دولت تقریباً 485 کروڑ روپئے ہے جس سے وہ بالی ووڈ کی امیر ترین اداکاراؤں میں شمار کی جاتی ہیں۔ فلموں کے ساتھ ساتھ وہ برانڈز اور اشتہارات سے بھی خطیر آمدنی حاصل کرتی ہیں۔ کرینہ کپور اپنی فٹنس اور اپنے حسن کو برقرار رکھنے کیلئے سخت اصولوں پر عمل کرتی ہیں۔ وہ روزانہ ہائی انٹینسٹی ورزش اور ویٹ ٹریننگ کرتی ہیں جبکہ اپنی غذا میں روایتی کھانوں کو ترجیح دیتی ہیں جن میں دال چاول، سبزیاں اور کھچڑی شامل ہیں۔ ان کا ماننا ہے کہ صحت مند رہنے کیلئے فاسٹ فوڈ کے بجائے گھریلو کھانے زیادہ مؤثر ہیں۔ اداکارہ شام کے وقت جلدی کھانا کھانے اور رات کو وقت پر سونے کی عادی ہیں۔ یوگا اور ذہنی سکون پر توجہ دینا بھی ان کی روزمرہ زندگی کا حصہ ہے۔ کرینہ کے مطابق خوبصورتی صرف جسمانی نہیں بلکہ ذہنی سکون اور خوشی سے بھی جڑی ہوتی ہے۔ کرینہ کپور نے 2000ء میں فلمی کیریئر کا آغاز کیا اور آج وہ بالی ووڈ کی کامیاب اور مقبول اداکاراؤں میں شمار کی جاتی ہیں۔ ان کی مشہور فلموں میں جب وی میٹ، کبھی خوشی کبھی غم، تلاش، 3 ایڈیٹس، گول مال ریٹرنز، گول مال 3، ویرے دی ویڈنگ، ہیروئن، بجرنگی بھائی جان، ٹشن، رافٹار 786، چلتے چلتے (خصوصی کردار)، اشوکا، چمکیلا اور متعدد دیگر فلمیں شامل ہیں۔
