حیدرآباد۔ اسپیشل آپریشن ٹیم ایل بی نگر زو ن نے ایک خود ساختہ ریلوے بورڈ ممبر کو گرفتار کرلیا جو اپنے آپ کو سنٹرل فلم سنسر بورڈ کا رکن بھی ظاہر کررہا تھا۔ ساؤتھ سنٹرل ریلوے بورڈ سے اس کا کوئی تعلق نہیں تھا ۔ ایس او ٹی نے ایک اطلاع پر کارروائی کرتے ہوئے 44 سالہ کوٹا وینکٹیش کو گرفتار کرلیا اور اس کے قبضہ سے فرضی شناختی کارڈ، بولیرو گاڑی اور وزیٹنگ کارڈ کو ضبط کرلیا جو ایس بی ایچ کالونی ایل بی نگر کا ساکن تھا۔ اس کے رویہ اور غیر سماجی حرکتوں سے نہ صرف عوام بلکہ اس کے افراد خاندان بھی تنگ آچکے تھے۔ گذشتہ دنوں اس کی والدہ نے بھی اس کے خلاف شکایت کی تھی۔ پولیس کے مطابق رئیل اسٹیٹ کا کاروبار کرنے والا کوٹا وینکٹیش سال 2016 تا 2018 فلم سنسر بورڈکا رکن رہ چکا ہے۔ عہدہ کی میعاد مکمل ہونے کے باوجود بھی وہ اپنے آپ کو اس کا رُکن ظاہر کرتے ہوئے عوام پر رعب جمانے کی خاطر اس کا غلط استعمال کررہا تھا۔ رئیل اسٹیٹ کے کاروبار میں اپنے اثر و رسوخ کو ظاہر کرنے کیلئے مبینہ طور پر عام شہریوں اور تاجروں کو رکن ظاہر کرنے کی کوشش کررہا تھا۔ پولیس نے کارروائی کرتے ہوئے گرفتار کرلیا اور اس کے فرضی شناختی کارڈز ، آئی ڈی اور وزیٹنگ کارڈز کے علاوہ اس کی گاڑی کو بھی ضبط کرلیا۔
