سیاسی جماعتوں کو سپریم کورٹ کی ہدایت ۔ مؤثر عمل آوری الیکشن کمیشن کی ذمہ داری
نئی دہلی۔ 13 فروری (سیاست ڈاٹ کام) سپریم کورٹ نے ایک اہم فیصلے میں سیاسی پارٹیوں کو ہدایت دی کہ وہ مجرمانہ پس منظر والے امیدواروں کی فہرست اور منتخب ہونے کا سبب اپنی ویب سائٹس پر اپ لوڈ کریں۔جسٹس آر ایف نریمن اور جسٹس ایس روندر بھٹ کی بنچ نے بی جے پی لیڈر اشونی کمار اپادھیائے اور رام بابو شرما کی توہین عدالت کی درخواست پر یہ حکم دیا۔عدالت نے ان ہدایات پر عمل نہ کئے جانے پر الیکشن کمیشن کو اس بات کی اجازت دی ہے کہ وہ سیاسی پارٹیوں کے خلاف ان معلومات سے عدالت کو آگاہ کر یں ۔سیاست کو جرائم زدہ ہونے سے روکنے کے لئے عدالت نے سیاسی پارٹیوں کے لئے یہ رہنمایانہ خطوط جاری کئے ہیں ۔ عدالت عظمیٰ نے کہا کہ گزشتہ چار عام انتخابات کے دوران سیاست میں جرائم میںتیزی سے اضافہ ہوا ہے ۔ اس کے مطابق، اگر سیاسی پارٹیوں کی طرف سے مجرمانہ پس منظر کے افراد کو ٹکٹ دیا جاتا ہے تو اس کے جرائم کی تفصیلات پارٹی کی ویب سائٹ پر اور سوشل میڈیا پر پیش کرنا ہو گا۔ ساتھ ہی انہیں یہ بھی بتانا ہوگا کہ کسی بے داغ یا اچھے کردار کے امیدوارکو ٹکٹ کیوں نہیں دیا گیا؟عدالت عظمی نے امیدواروں کے خلاف فوجداری مقدمات کی معلومات اخبارات، نیو چینلز اور سوشل میڈیا پر بھی نامزدگی منظور ہونے کے 48 گھنٹوں کے اندر شائع کرنے کی ہدایت دی ہے ۔ اگر سیاسی پارٹی ایسا نہیں کرتی ہے تو الیکشن کمیشن اس کی معلومات سپریم کورٹ کو دے گا۔