امیگریشن کا عمل چند سیکنڈز میں ممکن‘ مسافرین کو سہولت
دبئی ۔28؍ستمبر ( ایجنسیز )دبئی انٹرنیشنل ائیرپورٹ نے مسافروں کے لیے ریڈ کارپٹ اسمارٹ کوریڈور متعارف کروا دیا ہے جس کی وجہ سے امیگریشن کا عمل اب صرف چند سیکنڈز میں مکمل ہو رہا ہے۔دبئی ائیرپورٹ کے جدید نظام میں پاسپورٹ یا بورڈنگ پاس دکھانے کی ضرورت نہیں اور مسافر بیک وقت 10 افراد کے ساتھ کوریڈور سے گزر سکتے ہیں۔یہ سہولت دنیا کا پہلا مصنوعی ذہانت ( Intelligence Artificial) پر مبنی مسافروں کا کوریڈور ہے اور فی الحال ٹرمینل تھری، بزنس کلاس ڈیپارچر ہال میں دستیاب ہے۔دبئی حکام کے مطابق اس نظام سے خصوصاً فیملیز کو سب سے زیادہ فائدہ ہوگا کیونکہ وقت کی بچت کے ساتھ ساتھ امیگریشن کا عمل زیادہ سہل اور تیز ہو گیا ہے۔GDRFA Dubai کے مطابق یہ اسمارٹ کوریڈور دبئی ائیرپورٹ کے مسافروں کے لیے ایک انقلابی سہولت ہے جس سے امیگریشن کا عمل چند سیکنڈز میں مکمل ہوتا ہے۔ مستقبل میں اس سہولت کو تمام ٹرمینلز میں وسعت دینے کا منصوبہ ہے۔ دبئی ائیرپورٹ کو مزید ڈیجیٹل سہولیات سے آراستہ کرنے کا بھی منصوبہ تیار کیا جارہا ہے۔اس اقدام سے دبئی اپنے وژن کی جانب ایک قدم اور بڑھ گیا ہے جس میں شہر کو دنیا کے بہترین مقامات میں سے ایک کے طور پر پیش کرنے کے لیے ڈیجیٹل اور آرٹیفیشل انٹیلیجنس ( AI ) ٹیکنالوجی پر خصوصی توجہ دی جارہی ہے ۔