دبئی ۔دبئی ایرپورٹ پر دنیا بھر سے سیاحوں کی آمد کا سلسلہ دوبارہ شروع ہوگیا ہے۔جہاں عرب اور دیگر ممالک سے پروازیں پہنچی ہیں۔میڈیا کے مطابق متحدہ عرب امارات کی ریاست دبئی نے کورونا بحران پر کافی حد تک قابو پانے کے بعد اپنے دروازے سیاحوں کے لیے دوبارہ کھول دیئے ہیں۔دبئی ایرپورٹ پر سیاحوں کی پہلی پروازیں جان ایف کینیڈی واشنگٹن ، شکاگو، ٹورنٹو اور بیروت کے علاوہ دیگر ایرپورٹس سے یہاں پہنچی ہیں۔دبئی ایرپورٹ نے کورونا وائرس سے بچاو اور مسافروں کی سلامتی کے لیے تمام حفاظتی تدابیر اختیارکر رکھی ہیں۔ یہ اقدامات مسافروں کی صحت کو یقینی بناتے ہیں۔قبل ازیں دبئی ڈیزاسٹر مینجمنٹ کی سپریم کمیٹی نے فیصلہ کیا تھا کہ مخصوص اور محفوظ طریقہ کار کے ذریعے دبئی آنے والے سیاحوں کی آمد کا سلسلہ شروع کیا جائے جو مسافروں کی صحت اور حفاظت کی ضمانت دے۔تفصیلات کے مطابق دبئی کے ہوٹلوں نے مکمل تحفظات کے ساتھ سیاحوں کے استقبال کا انتظام کر رکھا ہے۔یہاں ہوٹلوں میں 127ہزار 844 کمرے موجود ہیں جن میں لگژری ریزروٹس اور تفریحی سہولیات مہیا کی گئی ہیں۔دبئی ایرپورٹ اتھارٹی نے کہا ہے کہ امارات ایر لائنز اور فلائی دبئی کی مزید شہروں سے پروازیں شروع کرنے کے اعلان کے ساتھ سیاحوں کی تعداد میں اضافہ ہو رہا ہے۔دبئی ایرپورٹ دنیا بھر میں بین الاقوامی مسافر کی آمدورفت کے لحاظ سے سب سے بڑا ایرپورٹ ہے۔دبئی کے محکمہ سیاحت اور تجارت نے سیاحت کی تیاری کے عنوان سے غیر معمولی اقدامات کرتے ہوئے حوصلہ افزاء انتظامات کا جائزہ لینے کے لیے دنیا بھر سے تین ہزار افراد کو دعوت دی ہے۔
