دبئی ۔ دبئی میں دنیا کے سب سے بڑے فوارے (پام فاؤنٹین) کا افتتاح جمعرات 22 اکتوبر کو کیا جارہا ہے۔فوارے کو النخلہ کا نام دیاگیا ہے جسے ممکنہ طور پرگنیز بک آف ورلڈ ریکارڈ میں شامل کیا جائے گا۔ تفصیلات کے مطابق فوارہ105 میٹر اونچا ہے اور یہ 14 ہزار مکعب فٹ کے دائرے میں پھیلا ہوگا۔ اس کے نچلے حصے میں 3 ہزار سے زیادہ بلب لگائے گئے ہیں جن کی رنگا رنگ روشنی سے پانی کے ساتھ دل کش منظر دیکھنے کو ملے گا۔النخلہ فوارے کے افتتاح کے موقع پر آتشبازی کے علاوہ مختلف قسم کے مقابلے اور ڈانس شو بھی ہوں گے۔ انتظامیہ روزانہ 20 شو پیش کرے گی۔ اس کی شروعات مغرب کے بعد سے ہوگی جس کا سلسلہ آدھی رات تک جاری رہے گا۔ ہر شو کا دورانیہ 3 منٹ کا ہوگا۔ ایک شو سے دوسرے شو کے درمیان تیس منٹ کا وقفہ ہوگا۔مشرق وسطٰی اور شمالی افریقہ میں گنیز بک آف ورلڈ ریکارڈ کے انچارج شادی جاد نے کہا ہے کہ النخلہ فوارہ دبئی کے پرکشش اور قابل دید مقامات میں شاندار اضافہ ثابت ہوگا۔ یاد رہے کہ اس وقت دبئی مال کا دبئی فاؤنٹین دنیا کا سب سے بڑا فوارہ مانا جاتا ہے تاہم پام فاؤنٹین کے افتتاح کے بعد یہ دوسرے نمبر پر آجائے گا۔
