تارکین وطن کو نوکریوں سے محرومی یا تنخواہوں میں کٹوتی کا سامنا : رپورٹ
دبئی۔ 30 اپریل (سیاست ڈاٹ کام) متحدہ عرب امارات کے دبئی میں کورونا وائرس کی وجہ سے عائد پابندیوں اور لاک ڈاؤن سے پریشان ہندوستانی اور پاکستانی شہری اپنا سونا فروخت کرنے پر مجبور ہوگئے۔کورونا وائرس کی وجہ سے دبئی سمیت متحدہ عرب امارات میں موجود لاکھوں تارکین وطن یا تو نوکریوں سے محروم ہوگئے ہیں یا پھر انہیں تنخواہوں میں کٹوتی کا سامنا ہے۔خلیجی اخبار کی رپورٹ کے مطابق دبئی میں بیشتر تارکین وطن اپنی بچت سونے کی شکل میں محفوظ رکھنے کو ترجیح دیتے ہیں۔رپورٹ کے مطابق کورونا وائرس کی وجہ سے پیدا ہونے والے معاشی بحران کے باعث کئی تارکین وطن اپنے روزمرہ کے اخراجات پورے کرنے یا کسی ممکنہ ہنگامی صورت حال میں اپنے پاس رقم رکھنے کیلئے سونا بیچنے پر مجبور ہوگئے ہیں۔ دکانداروں کے مطابق سونا بیچنے والوں میں زیادہ تر ہندوستانی ، پاکستانی، بنگلہ دیشی ، نیپالی اور سری لنکن باشندے شامل ہیں۔کورونا بحران کے دوران گذشہ ایک ماہ میں متحدہ عرب امارات میں میں سونے کی قیمتوں میں ساڑھے 7 فیصد سے زائد اضافہ ہوچکا ہے۔واضح رہے کہ متحدہ عرب امارات میں کورونا وائرس سے متاثرہ افراد کی تعداد 12 ہزار سے زائد ہوچکی ہے جب کہ 105 افراد ہلاک ہوچکے ہیں۔کورونا کے پھیلاؤ کو روکنے کیلئے دبئی سمیت متحدہ عرب امارات میں لاک ڈاؤن ہے تاہم یکم رمضان سے کرفیو میں نرمی کا اعلان کیا گیا ہے اور دوپہر 12 سے روزانہ 10 گھنٹے شاپنگ مالس کھلے ہیں۔