دبئی۔یکم مئی(سیاست ڈاٹ کام) دبئی ٹرانسپورٹ اینڈ روڈز اتھارٹی نے ڈرائیونگ اسکول بحال کر دیے۔اسکولوں کو حفاظتی قواعد و ضوابط کی سختی کے ساتھ پابندی کا حکم دے دیا۔تفصیلات کے مطابق دبئی اتھارٹی نے ڈرائیونگ سکھانے والے اسکول 30 اپریل کو بحال کرتے ہوئے تنبیہ کی ہے کہ حفاظتی اقدامات کی پابندی نہ کرنے کی صورت میں سخت کارروائی ہوگی۔ دبئی حکام نے 22 مارچ کو ڈرائیونگ اسکول بند کردیے تھے۔دبئی ٹرانسپورٹ اینڈ روڈز اتھارٹی نے خبردار کیا ہے کہ اس کے انسپکٹرز وقتا فوقتا اسکولوں پر چھاپے مار کر یہ پتہ لگائیں گے کہ صحت و سلامتی کے ضوابط کی پابندی کس حد تک کی جا رہی ہے۔حفاظتی اقدامات کی خلاف ورزی ریکارڈ ہوئی تو ڈرائیونگ اسکول فورا بند کر دیا جائے گا۔ اتھارٹی نے ڈرائیونگ اسکولوں کے لیے شرائط جاری کی ہیں۔ اسکول میں آنے جانے کے دروازے الگ ہوں، اسکول میں جتنے افراد کی گنجائش ہو اس کے 30 فیصد ہی اسکول میں رہیں اس سے زیادہ نہیں۔ درجہ حرارت فاصلے سے چیک کرنے والے آلات مہیا کیے جائیں۔ اسکول میں مختلف مقامات پر سینیٹائزر رکھے جائیں۔صفائی ٹیم سینیٹائزنگ کی پابندی کرے کرسی دفاتر کے دروازوں کے ہینڈل اور مختلف آلات کو سینیٹائز کرتی رہے۔
