دبئی ۔ دبئی میں ایک بیرونی شخص نے 14 لاکھ درہم (2.79کروڑ روپے سے زائد) میں کرائے پر وِلا حاصل کیا ہے۔ دبئی میں بی ایچ ریئل اسٹیٹ کمپنی نے کہا ہے کہ بیرونی اس شخص نے نخلۃ جمیرہ میں ولا کرائے پر لیا ہے۔ بی ایچ ریئل اسٹیٹ کمپنی نے کہا کہ یہ ولا6 کمروں پر مشتمل ہے اورکرائے کا معاہدہ تین سال کے لیے کیا گیا ہے۔ کرایہ دار امارات میں مقیم فرانس کا شہری ہے۔ بی ایچ ریئل اسٹیٹ کمپنی میں مینجمنٹ ڈائریکٹر نیک جراسیک کے مطابق یہ ولا نخلۃ جمیرہ کے آخر میں واقع ہے۔ اس مکان میں ساحل اور سوئمنگ پول ہے۔ اس میں اوربھی کئی خوبیاں اور سہولتیں موجود ہیں۔ نخلۃ جمیرہ دنیا کا مہنگا ترین علاقہ مانا جاتا ہے۔ جراسیک نے کہا ہے کہ آج کل دنیا بھر میں کورونا وبا کے باعث کرایے کم ہورہے ہیں تاہم نخلۃ الجمیرہ جیسے بعض علاقے دبئی میں ایسے ہیں جہاں رہائش کی طلب آج بھی اپنی جگہ پر موجود ہے۔
