اولیاء کے آستانوں سے چیف منسٹر کو خصوصی عقیدت، وزیر داخلہ محمد محمود علی کا دورہ اور میڈیا سے بات چیت
شاد نگر۔/18 ڈسمبر، ( سیاست ڈسٹرکٹ نیوز) اولیاء اللہ کے آستانوں سے چیف منسٹر کے چندر شیکھر راؤ کو خصوصی محبت و عقیدت ہے ۔ ریاست تلنگانہ کی مشہور و معروف بارگاہ درگاہ حضرت سید جہانگیرپیراں ؒ کو بڑے پیمانے پر ترقی فراہم کرنے کیلئے کے سی آر نے اپنی منت پوری کرنے کے موقع پر درگاہ کو 100 ایکڑ وسیع و عریض بنانے اور 50 کروڑ روپئے منظور کرنے کا اعلان کیا تھا۔ درگاہ شریف کو جامع پلان کے ذریعہ زائرین کیلئے سہولت بخش بنانے کا حکومت بالخصوص چیف منسٹر کے سی آر ارادہ رکھتے ہیں۔ ان خیالات کا اظہار ریاستی وزیر داخلہ الحاج محمد محمود علی نے اپنے دورہ درگاہ شریف کے موقع پر میڈیا کے نمائندوں سے خطاب کرتے ہوئے کیا۔ انہوں نے کہا کہ درگاہ شریف کے ڈیولپمنٹ پروگرام کو انجام دیئے جانے کے موقع پر درگاہ شریف میں فی الحال تجارت کرنے والے کسی بھی فرد کو نقصان نہیں پہنچایا جائے گا۔ انہوں نے درگاہ شریف کے تاجرین اور مقامی عوام سے تعاون فراہم کرنے پر زور دیا۔ انہوں نے کہا کہ آئندہ ماہ چیف منسٹر کے چندر شیکھر راؤ کے ہاتھوں درگاہ کے ڈیولپمنٹ کاموں کا سنگ بنیاد رکھا جائے گا۔اس موقع پر ریاستی وزیر کے ایشور، ریاستی وزیر سرینواس گوڑ نے کہا کہ تلنگانہ حکومت بالخصوص چیف منسٹر کے سی آر ریاست کے تمام طبقات کے ساتھ انصاف کرتے ہوئے ریاست کو ترقی کی سمت گامزن کررہے ہیں۔ قبل ازیں ریاستی وزراء جناب الحاج محمد محمود علی، کے ایشور، سرینواس گوڑ، رکن اسمبلی وائی انجیا یادو، ریاستی وقف بورڈ چیرمین الحاج محمد سلیم، ریاستی حج کمیٹی چیرمین جناب مسیح اللہ خان، ریاستی میناریٹی فینانس کارپوریشن چیرمین جناب اکبر حسین، تلنگانہ میناریٹی مشیر جناب اے کے خان، پرنسپال سکریٹری اجئے شرما، میناریٹی ویلفیر ڈائرکٹر شاہنواز قاسم، ضلع رنگاریڈی ویلفیر آفیسر رتنا کلیانی ، رنگاریڈی ضلع کلکٹر ہریش ، آر ڈی او شاد نگر ایم کرشنا اور دیگر ریاستی وقف بورڈ اور میناریٹی ویلفیر کے اعلیٰ عہدیداروں نے درگاہ حضرت جہانگیر پیراں ؒ پر حاضری دیتے ہوئے چادر گل پیش کی اور فاتحہ خوانی کی۔ بعد ازاں مذکورہ تمام وزراء ، رکن اسمبلی شاد نگر اور تمام عہدیداروں نے درگاہ شریف کا دورہ کرتے ہوئے تفصیلی معائنہ کیا۔ وزراء، رکن اسمبلی شاد نگر اور تمام عہدیداروں نے درگاہ ڈیولپمنٹ کے متعلق آپس میں تبادلہ خیال کیا اور درگاہ شریف کو شاندار پیمانہ پرجامع منصوبہ کے تحت ترقی فراہم کرنے کا تیقن دیا۔ ڈیولپمنٹ پلان کی انجام دہی میں عوامی تعاون کو بے حد ضروری قرار دیا۔
