حیدرآباد ، 16 اکتوبر ( یو این آئی) دل کا دورہ پڑنے سے آرٹی سی کے ڈرائیور کی موت ہوگئی۔اس ڈرائیور کی شناخت نلگنڈہ ضلع کے متوطن،حیدرآباد کے میاں پور ڈپو 1کے ڈرائیور ای لکشمیا کے طورپر کی گئی ہے ۔بتایاجاتا ہے کہ وہ آرٹی سی ورکرس کی ہڑتال کی وجہ سے مایوس تھا،اس کو ملازمت کے چلے جانے کا خوف تھا۔آرٹی سی ہڑتال کے بعد ایسا تیسرا واقعہ ہے ۔پہلے واقعہ میں 57سالہ ڈی کومرئیا جو چنگی چرلہ ڈپو کا ڈرائیور تھا،مایوسی کے عالم میں دل کا دورہ پڑنے سے چل بسا۔ریلی نکالنے کے دوران گر پڑنے کے نتیجہ میں اس کو دل کادورہ پڑا اور اسپتال منتقلی پر ڈاکٹرس نے اس کو مردہ قرار دیا۔دوسرے واقعہ میں ایچ سی یو ڈپو سے وابستہ شیخ خلیل میاں کی بھی موت ہوگئی۔خلیل میاں پر فالج کا حملہ ہوا۔وہ احتجاج کے بعد گھر واپس ہوئے تھے ، ان کو اسپتال منتقل کیاگیا جہاں ڈاکٹرس نے ان کو مردہ قرار دیا۔
