جنیوا ؍ بیجنگ ؍ نئی دہلی۔عالمی وباکورونا وائرس کا قہر جاری ہے اور اب تک 1.48 کروڑ سے زیادہ افراد اس وائرس سے متاثر اور چھ لاکھ سے زائد افراد ہلاک ہوچکے ہیں۔جان لیواکورونا وائرس نے دنیا بھر میں مسلسل اپنی ہلاکت خیزی جاری رکھی ہے جس کے نہ صرف مریضوں میں بلکہ اس سے اموات میں بھی ہر روز اضافہ ہو رہا ہے ۔دنیا بھر میں کورونا وائرس سے متاثرہ افراد کی تعداد 1 کروڑ 48 لاکھ 59 ہزار 408 تک جا پہنچی ہے جبکہ اس موذی وائرس سے ہلاکتیں 6 لاکھ 13 ہزار 354 ہو گئیں۔ کورونا وائرس کے دنیا بھر میں 53 لاکھ 34 ہزار 713 مریض اسپتالوں، قرنطینہ مراکز میں زیرِ علاج اور گھروں میں آئسولیشن میں ہیں، جن میں سے 63 ہزار 699 کی حالت تشویش ناک ہے جبکہ 89 لاکھ 11 ہزار 341 مریض صحت یاب ہو چکے ہیں۔ابھی تک امریکہ کورونا وائرس سے سب سے زیادہ متاثرہ ملک ہے جہاں ناصرف کورونا مریض بلکہ اس سے ہلاکتیں بھی اب تک دنیا کے تمام ممالک میں سب سے زیادہ ہیں۔امریکہ میں کورونا وائرس سے اب تک 1 لاکھ 43 ہزار 834 افراد موت کے منہ میں پہنچ چکے ہیں جبکہ اس سے بیمار ہونے والوں کی مجموعی تعداد 39 لاکھ 61 ہزار 429 ہو چکی ہے ۔