نئی دہلی: دہلی میں حکمراں عام آدمی پارٹی نے چہارشنبہ کو مودی حکومت پر بدعنوانی میں ڈوبنے کا الزام لگاتے ہوئے کہا کہ دوارکا ایکسپریس وے کی تعمیر میں ملک کا سب سے بڑا گھوٹالہ ہوا ہے ۔عام آدمی پارٹی کی قومی ترجمان پرینکا ککڑ کی قیادت میں پارٹی لیڈروں نے آج دوارکا ایکسپریس وے کا دورہ کیا اور کمپٹرولر اینڈ آڈیٹر جنرل (سی اے جی) کی رپورٹ سے اس کی تعمیر میں مودی حکومت کی طرف سے کی گئی بدعنوانی کے انکشاف پرمظاہرہ کیا۔ اس دوران ککڑ نے کہا کہ یہ سڑک 18 کروڑ روپے فی کلومیٹر کے حساب سے بنائی جانی تھی، لیکن مودی حکومت نے منظوری لیے بغیر اسے 251 کروڑ روپئے فی کلومیٹر کے حساب سے بنایا۔ سی اے جی کی رپورٹ میں مودی حکومت کی بدعنوانی کا انکشاف ہوا ہے ۔ انہوں نے کہا کہ ایک طرف مودی حکومت بدعنوانی میں ڈوبی ہے اور دوسری طرف کجریوال حکومت آزاد پور فلائی اوور کی تعمیر میں 100 کروڑ روپئے بچاکر اس رقم سے عوام کو سہولیات فراہم کرتی ہے ۔ عآپ کے ایم ایل اے کلدیپ کمار نے کہا کہ وزیراعظم کہتے ہیں، نہ کھاؤں گا اور نہ کھانے دوں گا، یہ صرف بات ہے ، مودی حکومت کو سڑک میں بھی دلالی کھانی ہے ۔ سی اے جی کی رپورٹ سامنے آنے کے بعد پورے ملک میں بھونچال آگیا ہے ۔ وزیر اعظم لال قلعہ کی فصیل سے بدعنوانی کے حوالے سے بڑی بڑی باتیں کرتے ہیں، لیکن اب ملک کو پتہ چل گیا ہے کہ وہ صرف جملے بازی کرتے ہیں اور جھوٹ بولتے ہیں۔ پورا ملک دیکھ رہا ہے کہ کس طرح 18 کروڑ روپئے فی کلومیٹر کی لاگت سے بننے والے ایکسپریس وے کو 251 کروڑ روپے فی کلومیٹر میں بنایا گیا۔
