واشنگٹن ۔ 29 ستمبر ۔ ( ایجنسیز ) اسرائیلی وزیراعظم نیتن یاہو نے قطری وزیراعظم سے فون کال پر دوحہ حملہ پر معذرت کی ہے۔خلیج ٹائمز کی رپورٹ کے مطابق اسرائیل کے چینل 12 کے نمائندے باراک راویڈ کے مطابق نیتن یاہو نے وائٹ ہاؤس سے قطر کے وزیراعظم شیخ محمد بن عبدالرحمن آل ثانی کو فون کیا اور اُن سے دوحہ حملہ پر معذرت کی۔ واضح رہے کہ نیتن یاہو اور امریکی صدر ڈونالڈ ٹرمپ کے درمیان وائٹ ہاؤس میں اہم ملاقات ہوگی جس میں غزہ میں جنگ کے خاتمے کے لیے صدر ٹرمپ کے مجوزہ امن منصوبے پر تبادلہ خیال کیا جائے گا۔خلیج ٹائمز نے ایک علیحدہ ذرائع کے حوالے سے رپورٹ کیا کہ قطری تکنیکی ٹیم بھی وائٹ ہاؤس میں موجود ہے۔خیال رہے کہ اسرائیل نے 9 ستمبر کو قطر کے دارالحکومت دوحہ میں حماس کے سینئر رہنماؤں کو نشانہ بنانے کے لیے فضائی حملہ کیا تھا تاہم حملے میں حماس رہنما خلیل الحیہ محفوظ رہے تھے لیکن ان کے بیٹے اور معاون سمیت 6 افراد شہید ہوگئے تھے۔یہ حملہ اُس وقت ہوا تھا، جب حماس کے مذاکرات کار امریکہ کی جانب سے پیش کی گئی تازہ ترین جنگ بندی کی تجویز پر غور کرنے کیلئے ملاقات کر رہے تھے۔اسرائیل کی جانب سے دوحہ میں حماس رہنماؤں کو نشانہ بنانے پر عالمی سطح پر سخت مذمت اور تنقیدیں کی گئیں تھیں۔ اسرائیلی حملوں کے ردِ عمل میں عرب ممالک سمیت پاکستان اور اقوامِ متحدہ نے واقعہ کی شدید مذمت کی تھی۔
