کراچی ۔12 اکٹوبر (سیاست ڈاٹ کام ) سری لنکا کے خلاف ٹی20 سیریز میں ناکامی کے باوجود پاکستان کرکٹ بورڈ (پی سی بی) نے سرفراز احمد کو ایک اور موقع دیتے ہوئے دورہ آسٹریلیا پر ٹی20 سیریز کے لیے کپتان برقرار اور ٹسٹ ٹیم کی قیادت اظہر علی کو سونپنے کا فیصلہ کیا ہے۔ ٹی 20 میں عالمی نمبر ایک پاکستان کی سری لنکا کے خلاف مایوس کن کارکردگی اور سیریز میں 0-3 کی کلین سوئپ شکست کے باوجود سرفراز احمد قیادت بچانے میں کامیاب ہو گئے۔ ذرائع کے مطابق پی سی بی نے دورہ آسٹریلیا پر ٹی20 سیریز کے لیے سرفراز احمد کو کپتان برقرار رکھنے کا فیصلہ کیا ہے لیکن ٹسٹ فارمیٹ میں ان کی جگہ قیادت اظہر علی کے سپرد کی جا سکتی ہے۔ سری لنکا کے خلاف سیریز میں ناکامی کے باوجود سابق کارکردگی کو مدنظر رکھتے ہوئے پی سی بی اور ٹیم مینجمنٹ سرفراز احمد کو بطور کپتان ایک اور موقع دینے کے حق میں ہیں اور اسی وجہ سے انہیں کپتان کے منصب پر برقرار رکھنے کا فیصلہ کیا گیا ہے لیکن سری لنکا کے خلاف سیریز میں واپسی کے بعد مایوس کن کارکردگی دکھانے والے عمر اکمل اور احمد شہزاد کو خارج کر کے ان کی جگہ تجربہ کار محمد حفیظ اور شعیب ملک کو ٹیم میں شامل کیے جانے کا امکان ہے۔ ابھی تک ٹیم کو حتمی شکل نہیں دی گئی لیکن دونوں سینئر کھلاڑیوں کے ساتھ ساتھ ٹی20 کپ میں نوجوان کرکٹرز کی کارکردگی کو بھی مدنظر رکھا جائے گا اور اس ایونٹ میں کارکردگی کی بنیاد پر کھلاڑیوں کو ٹیم میں شامل کیا جائے گا۔ دورہ آسٹریلیا کے لیے پاکستانی ٹی20 اسکواڈ کا اعلان نیشنل ٹی20 ٹورنمنٹ کے پہلے راؤنڈ کے اختتام پر کیا جائے گا جبکہ پاکستان اور آسٹریلیا کے درمیان تین ٹی20 میچوں کی سیریز 3 نومبر کو شروع ہو گی۔
