رمیز راجہ کا اظہار حیرت، ٹسٹ ٹیم کیلئے محمد حسنین کی وکالت
لاہور: 27 ۔ ا کتوبر (سیاست ڈاٹ کام) آسٹریلیا سے ٹسٹ سیریز کیلئے ناتجربہ بولنگ اٹیک کے انتخاب پر رمیز راجہ نے حیرانی کا اظہار کیا۔ سابق کپتان رمیز راجہ نے کہاکہ محمد موسٰی اور نسیم شاہ باصلاحیت ہیں لیکن دونوں نے کبھی آسٹریلیا کا دورہ نہیں کیا، کس بنیاد پر ٹسٹ سیریز کے لئے نئے اور ناتجربہ کار کھلاڑیوں کو منتخب کیا گیا، یہ ممکن نہیں ہے کہ وہ راتوں رات دنیا کو تسخیر کرنے والے بولرز بن جائیں گے جبکہ انھیں یہ بھی معلوم نہیں کہ آسٹریلوی پچز پر کس لائن اور لینتھ پر بولنگ کرنا ہے۔ایک انٹرویو میں انھوں نے مزیدکہا کہ کسی ایک نوجوان بولر کو موقع دے سکتے ہیں لیکن پورا اٹیک ان پر مشتمل نہیں ہونا چاہئے، ٹی ٹوئنٹی کرکٹ میں تو نئے چہروں کو آزمایا جا سکتا ہے لیکن ٹسٹ میچز میں ایسا بڑا خطرہ مول لینا درست نہیں۔ انھوں نے کہا کہ عمران خان سینئر کا 2 سال بعد کم بیک ہورہا ہے،پیسر ویسے بھی ایشین کنڈیشنز کیلئے زیادہ موزوں ہیں، پاکستان کو محمد حسنین جیسے فاسٹ بولر کو ٹسٹ میں بھی آزمانا چاہئے تھا جو 150کی رفتار سے بولنگ کرتا ہے،اسی طرح سے گزشتہ دورہ آسٹریلیا میں ٹیم کے ساتھ رہنے والے محمد نواز اب بھی اچھی کارکردگی کا مظاہرہ کررہے ہیں،ان کو بھی اسکواڈ میں شامل کرنا چاہیے تھا، اس بولنگ اٹیک کے ساتھ آسٹریلیا میں جیتنے کا کوئی امکان نہیں، ہمیں فائٹ کرنے کی نہیں بلکہ جیت کا عزم لیکر آسٹریلیا کا دورہ کرنا چاہئے تھا، اگر پاکستان کو وہاں ناکامیوں کا سامنا کرنا پڑتا ہے تو سلیکٹرز کیلئے یہ کوئی جواز نہیں ہوگا کہ نئے کھلاڑیوں کو موقع دیا گیا اور ٹیم تشکیل نو سے گزر رہی ہے۔ رمیز راجہ نے کہا کہ سابق ٹسٹ کپتان ای این چیپل پہلے ہی کہتے رہے ہیں کہ پاکستان جیسی کمزور ٹیموں کو آسٹریلیا نہ بلوایا جائے، ایک اور ناکام سیریز شائقین کیلئے بھی قابل قبول نہیں ہوگی اور ہماری کرکٹ مزید پیچھے چلی جائے گی۔