کراچی ۔ پاکستان کرکٹ ٹیم انگلینڈ کے خلاف سیریز کھیلنے کیلئے خصوصی طیارے کے ذریعے لاہور سے مانچسٹر روانہ ہوگئی ہے۔اسکواڈ نے آج صبح 10 بجے لاہور ایرپورٹ سے خصوصی طیارے میں مانچسٹر کے لیے اڑان بھری، اسکواڈ میں 20 کھلاڑی اور 11 مینجمنٹ کے اراکین شامل ہیں۔ کورونا ٹسٹ مثبت آنے والے کھلاڑی 2 ٹسٹ منفی آنے کے بعد ٹیم کا حصہ بن سکیں گے۔ ٹیم کے بولنگ کوچ وقار یونس اور فزیوتھراپسٹ کلف ڈیکن آسٹریلیا اور جنوبی افریقہ سے ٹیم میںشامل ہوں گیجبکہ ظفر گوہر ٹیم کو صرف پری میچ تیاریوں کے لیے انگلینڈ میں دستیاب ہوں گے۔شیڈول کے مطابق پاکستان ٹیم کی کورونا ٹسٹنگ اور 14 روزکا قرنطینہ وورسسٹر میں ہوگا، جس کے بعد ٹیم 13 جولائی کو ڈربی شائر روانہ ہوگی جہاں وہ ڈربی شائر کاونٹی کرکٹ گراونڈ میں 2 چار روزہ میچز کھیلے گی۔پاکستان کے انگلینڈ کے خلاف سیریز کے تمام میچز مانچسٹر اور ساؤتھیمپٹن میں کھیلے جائیں گے۔واضح رہے کہ عالمی وباء کورونا وائرس کے بعد انگلینڈ کا دورہ کرنے والی ویسٹ انڈیز پہلی اور پاکستان دوسری ٹیم ہے۔