راولپنڈی(پاکستان)۔20؍اکتوبر( ایجنسیز ) پاکستان نے دوسرے ٹسٹ میاچ کے پہلے دن جنوبی افریقہ کیخلاف 5 وکٹوں پر 259 رنز بنالیے۔پاکستان کو دو ٹیسٹ میچوں کی سیریز میں ایک صفر کی سبقت حاصل ہے۔پاکستان اور جنوبی افریقہ کے درمیان دوسرے اور آخری ٹسٹ کا آج آغاز ہوا۔ پہلے روز کا کھیل اختتام پذیر ہوگیا اور پاکستان نے 5 وکٹوں پر 259 رنز بنالیے۔ راولپنڈی کرکٹ اسٹیڈیم میں کھیلے جا رہے میچ میں پاکستان کے کپتان شان مسعود نے ٹاس جیت کر پہلے بیٹنگ کا فیصلہ کیا۔ پاکستان کی جانب سے عبداللہ شفیق اور امام الحق نے اننگز کا آغاز کیا۔امام الحق 17 رنز بنا کر ہارمر کی گیند پر بولڈ ہو گئے جبکہ عبد اللہ شفیق نے 57 رنز کی اننگز کھیلی۔ بابر اعظم 16 رنز بنا کر کیشوو مہاراج کا شکار بنے جبکہ شان مسعود 87 اور محمد رضوان 19 رنز بناکر آؤٹ ہوگئے۔سعود شکیل 42 اور آغا سلمان 10 رنز کے ساتھ ناٹ آؤٹ ہیں۔جنوبی افریقہ کی جانب سے کیشوو مہاراج اور ہارمر نے 2،2 وکٹیں حاصل کیں جبکہ راباڈا نے ایک کھلاڑی کو آؤٹ کیا۔قبل ازیں ٹاس جیت کر قومی ٹیم کے کپتان شان مسعود کا کہنا تھا آج کے میچ کیلئے ٹیم میں ایک تبدیلی کی گئی ہے، ٹیم میں آصف آفریدی کو شامل کیا ہے جبکہ حسن علی کو آرام دیا گیا ہے۔پاکستان کی جانب سے آصف آفریدی ٹیسٹ ڈیبیو کررہے ہیں، شاہین آفریدی نے آصف آفریدی کو ٹسٹ کیپ دی۔ آصف آفریدی نے 39 سال 299 دن کی عمر میں ٹیسٹ ڈیبیو کیا ہے۔۔جنوبی افریقہ کے کپتان ایڈن مارکرم کا کہنا تھا ہم ٹاس جیتتے تو بیٹنگ ہی کرتے، پنڈی ٹسٹ کیلئے ٹیم میں دو تبدیلیاں کی ہیں، کیشو مہاراج، مارکو جینسن کو ٹیم میں شامل کیا گیا ہے۔خیال رہے کہ دو ٹسٹ میچوں کی سیریز میں پاکستان کو ایک صفر کی سبقت حاصل ہے، پاکستان نے لاہور ٹیسٹ میں جنوبی افریقہ کو 93 رنز سے شکست دی تھی۔دوسرے ٹسٹ میں بھی جیت کیلئے پاکستان پر عزم ہے۔
