سیول : 30 اکٹوبر ( ایجنسیز ) چینی صدر شی جن پنگ کا کہنا ہے کہ دونوں ممالک کو بدلہ لینے کے خطرناک چکر میں نہیں پڑنا چاہیے۔ چینی میڈیا رپورٹس کے مطابق جنوبی کوریا کے دورہ کے دوران چین اور امریکی اقتصادی، تجارتی ٹیموں نے تفیصلی گفتگو کی اور مسائل کے حل پر اتفاق کیا۔چینی صدر کا کہنا ہے کہ چین پُراعتماد ہے، چین کی معیشت ایک سمندر کی طرح ہے، چین ہر قسم کے خطرات اور چیلنجز سے نمٹنے کی صلاحیت رکھتا ہے۔شی جن پنگ نے کہا کہ چین کبھی بھی کسی ملک کو چیلنج کرنے یا اس کی جگہ لینے کی کوشش نہیں کرتا بلکہ اپنے کام کو بہتر کرنے پر توجہ دیتا ہے۔ بات چیت محاذ آرائی سے بہتر ہے۔انہوں نے کہا کہ امریکہ کے ساتھ تعلقات مجموعی طور پر مستحکم ہیں، چین اور امریکہ دونوں کی ٹیموں کو بات چیت پر فالو اپ کرنا چاہیے۔ ان کا کہنا ہے کہ چین اور امریکہ کے تعلقات کو وسعت دینے کیلئے تجارت اور معیشت کو بنیادی عنصر ہونا چاہیے۔ تجارتی تعلقات کو چین امریکا دوستی کی بنیاد ہونا چاہیے۔چینی صدر نے مزید کہا کہ چین اور امریکہ کے تعلقات میں توازن کے لیے تجارتی مراسم محور ہونا چاہئیں، دونوں ممالک کو تعاون کے طویل مدتی مفاد پر نظر رکھنی چاہیے۔ ان کا یہ بھی کہنا ہے کہ دونوں ممالک کو مسائل کم اور تعاون بڑھانا چاہیے۔ غیر قانونی امیگریشن روکنے پر دونوں ممالک کے درمیان تعاون کے مثبت رجحانات ہیں۔
