نئی دہلی۔ ہندوستانی ٹیم کے سابق کھلاڑی وی وی ایس لکشمن نے کہا ہے کہ سابق کپتان مہندر سنگھ دھونی نے اپنے طرز عمل سے دنیا بھر میں عزت حاصل کی ہے ۔ٹیم کے سابق کپتان دھونی نے اچانک15 اگست کو کرکٹ سے سبکدوشی کا اعلان کردیا۔ دھونی ٹیم کے واحد کپتان ہیں جنہوں نے آئی سی سی کے تینوں ٹورنمنٹس جیتے ہیں۔لکشمن نے اسٹار اسپورٹس شوکرکٹ کنکٹڈ سے گفتگو میں کہا کہ کرکٹ کے شائقین سے آپ کی کرکٹ کامیابیوں سے پیارملتا ہے لیکن احترام صرف آپ کے طرز عمل سے ملتا ہے ۔میں ہمیشہ محسوس کرتا ہوں کہ کسی کے لئے بھی ہندوستانی ٹیم کی کپتانی کرنا بہت مشکل ہے کیونکہ دنیا بھر کے لوگ ٹیم سے بہت توقع کرتے ہیں۔انہوں نے کہا کہ دنیا بھر کے ہندوستانی چاہتے ہیں کہ ٹیم عمدہ کارکردگی کا مظاہرہ کرے لہذا ہندوستانی ٹیم کے کپتان پر بہت زیادہ ذمہ داری عائد ہوتی ہے لیکن دھونی ہمیشہ نتائج سے جذباتی طور پر الگ رہے ہیں۔ سابق کھلاڑی نے کہا کہ انہوں نے نہ صرف کھیل کے شائقین بلکہ ہندوستانیوںکو بھی متاثرکیا اور بتایا کہ ملک کا سفیرکیسے بنا جاتا ہے اور آپ کو عوامی زندگی میں کس طرح برتاؤ کرنا ہے اس سے ہی انہیں اتنا احترام ملتا ہے ۔لکشمن نے کہا کہ اگر آپ سوشل میڈیا پوسٹ پر نگاہ ڈالیں تو نہ صرف سابق کھلاڑی یا کرکٹ کے شائقین بلکہ سارے ہندوستانی بشمول فلمی ستارے ، مشہور صنعتکار، سیاست دان انھیں نیک خواہشات پیش کررہے ہیں۔ پوری دنیا کے سابق کرکٹرز نے نہ صرف ہندوستانی کرکٹ بلکہ عالمی کرکٹ میں بھی اس کی شراکت کے لئے دھونی کا شکریہ ادا کیا ہے ۔
