نئی دہلی۔ 4مئی (سیاست ڈاٹ کام) ہندوستان کے نوجوان وکٹ کیپر رشبھ پنت نے کہا ہے کہ سابق کپتان مہندر سنگھ دھونی ہمیشہ مدد کرتے ہیں لیکن مکمل حل نہیں بتاتے کیونکہ انہیں لگتا ہے کہ کھلاڑی کو خود کفیل ہونا چاہئے۔دھونی گزشتہ سال انگلینڈ میں ہوئے آئی سی سی ورلڈ کپ میں نیوزی لینڈ کے خلاف سیمی فائنل مقابلے کے بعد سے اب تک میدان سے باہر ہیں۔اگرچہ وہ آئی پی ایل سے کرکٹ میں واپسی کرنے والے تھے لیکن کورونا وائرس کی وجہ سے ٹورنمنٹ کے غیر معینہ مدت کے لئے ملتوی ہونے کی وجہ سے ایسا ممکن نہیں ہو سکا۔پنت نے آئی پی ایل کی اپنی ٹیم دہلی کیپٹلس کے انسٹاگرام لائیو سیشن کے دوران کہاکہ دھونی میرے لئے میدان کے باہر اور اندر ایک مشیرکی طرح ہیں۔میں کسی بھی پریشانی کے لئے کبھی بھی ان سے مدد مانگ سکتا ہوں لیکن وہ کبھی بھی اس کے لئے مجھے مکمل حل نہیں بتاتے ہیں۔ہندوستان کے لئے 13 ٹسٹ، 16 ونڈے اور 28 ٹی 20 میچ کھیل چکے پنت نے کہا کہ دھونی ایسا اس لئے کرتے ہیں تاکہ میں ان پر انحصار نہ رہوں۔وہ صرف مجھے پریشانی کا حل خود نکالنے کے لئے اشارہ دیتے ہیں۔ وہ ساتھ ہی میرے پسندیدہ بیٹنگ پارٹنر ہیں۔ حالانکہ ایسا ہمیشہ نہیں ہوتا ہے۔دھونی کے جانشین مانے جا رہے نوجوان وکٹ کیپرنے کہا کہ اگر ماہی کریز پر موجود ہیں تو آپ کو پتہ رہتا ہے کہ حالات قابو میں ہیں۔ان کے ذہن میں منصوبہ بندی رہتی ہے جس پر ہمیں صرف عمل کرنا ہوتا ہے۔