نوئیڈا۔29 فروری (سیاست ڈاٹ کام ) ہندوستانی ٹیم کے سابق کپتان کپل دیو نے ٹیم کے سابق کپتان مہندر سنگھ دھونی کے کیریئر پر بیان دیتے ہوئے کہا ہے کہ دھونی بین الاقوامی کرکٹ کیریئر کے اپنے آخری دورمیں ہیں۔38 سالہ دھونی گزشتہ سال انگلینڈ میں ہوئے آئی سی سی ورلڈ کپ کے سیمی فائنل میچ میں نیوزی لینڈ کے خلاف شکست کے بعد سے ٹیم سے باہر ہے اورانہوں نے ابھی تک میدان پر واپسی نہیں کی ہے۔ دھونی انڈین پریمیئر لیگ (آئی پی ایل) میں چینائی کے لئے کھیلیں گے جس کے لئے وہ مارچ کے پہلے ہفتہ میں ٹرینگ کا آغاز کریں گے۔ کپل نے کہا کہ آئی پی ایل مستقبل کے کھلاڑیوں کی شناخت کے لئے ہے اور اس میں نوجوانوں کو اپنی صلاحیت دکھانے کا موقع ملتا ہے۔کپل نے یہاں ایک ایونٹ میں کہاکہ مجھے لگتا ہے کہ وہ اپنے کیریئر کے آخری دور میں ہیں۔ میں ان کا مداح ہوں اور اس وجہ سے میں ان کو آئی پی ایل میں کھیلتے دیکھنا پسند کروں گا لیکن اس کے ساتھ ہی میری نظر نوجوان کھلاڑیوں پر بھی ہو گی۔انہوں نے کہاکہ دھونی کے پرستارچاہتے ہیں کہ وہ انہیں ٹی 20 ورلڈ کپ میں کھیلتا ہوئے دیکھیں لیکن ایک کرکٹر ہونے کی وجہ سے مجھے لگتا ہے کہ یہ ٹیم مینجمنٹ پر منحصر ہے۔ ٹیم میں انتخاب کے لئے کسی بھی کھلاڑی کے لئے کوئی مختلف انتخابی عمل نہیں ہے۔کپل نے کہاکہ یہ صرف دھونی نہیں جو آئی پی ایل کھیل رہے ہیں۔ میں آئی پی ایل میں نوجوان کھلاڑیوں کا کھیلتے دیکھنا پسند کرتا ہوں جو مستقبل کی ٹیم کا حصہ ہوں گے۔ مجھے لگتا ہے کہ دھونی ٹیم اور ملک کے لئے بہت کچھ کر چکے ہیں۔جسپرپت بمراہ کی خراب فارم پر انہوں نے کہا کہ وہ اس سے زیادہ پریشان نہیں ہیں۔ سابق کپتان نے کہاکہ جب کھلاڑی چوٹ سے نکل کر ٹیم میں واپسی کرتے ہیں تو انہیں اپنی فارم میں آنے میں کچھ وقت لگتا ہے۔ انہوں نے بڑے میچوں میں اپنی صلاحیت کو ثابت کیا ہے اور ان کے لئے واپسی کرنا کوئی بڑی بات نہیں ہے۔یادرہے کہ دھونی اب آئی پی ایل کیلئے رواں ہفتے سے ٹرینگ شروع کررہے ہیں اور آئی پی ایل میں مظاہروں کی بنیاد پر ہی ان کی ٹیم میں واپسی متوقع ہے۔
