دبئی ۔7 جون (سیاست ڈاٹ کام )انٹرنیشنل کرکٹ کونسل (آئی سی سی) نے بورڈ آف کنٹرول فور کرکٹ اِن انڈیا (بی سی سی آئی) سے مہندر سنگھ دھونی کے وکٹ کیپنگ دستانوں سے فوج کا نشان ہٹانے کا مطالبہ کیا۔ رپورٹ کے مطابق ورلڈ کپ 2019 کے افتتاحی مقابلے میں وکٹ کیپر مہندر سنگھ دھونی کے گلوز پر بلیدان بیج دیکھاگیا تھا۔ آئی سی سی کے جنرل منیجر برائے اسٹریٹجک کمیونیکیشنز نے کہا کہ بی سی سی آئی سے درخواست کی گئی ہے کہ دھونی کے گلوز سے اس نشان کو ہٹایا جائے۔ بلیدان ہندوستان کی خصوصی فوج کا نشان ہے اور اسے صرف پیراملٹری کمانڈوزکو پہننے کی اجازت ہے۔ رپورٹ کے مطابق دھونی جنہیں 2011 میں پیراشوٹ رجمنٹ میں لیفٹننٹ کرنل کا اعزازی عہدہ دیا گیا تھا، نے 2015 میں پیرا برگیڈ ٹریننگ بھی حاصل کر رکھی ہے۔ قبل ازیں رواں سال مارچ کے مہینے میں ٹیم اپنے ہوم گراونڈ میں آسٹریلیا کے خلاف ونڈے میچ میں فوجی کیپ پہن کر آئی تھی۔
