سابق کپتان کوہلی اور سچن سے آگے
نئی دہلی۔27 ستمبر (سیاست ڈاٹ کام ) ہندوستانی کرکٹ ٹیم کے سابق کپتان مہندر سنگھ دھونی کی سبکدوشی کے متعلق بھلے ہی قیاس آرائیوں کا دورگرم ہے لیکن وہ اب بھی ملک میں پسند کئے جانے والی شخصیات میں دوسرے نمبر پر ہیں۔ وزیر اعظم نریندر مودی اس معاملے میں پہلے مقام پر ہیں۔ 38 سالہ دھونی اپنے کیریئر کے آخری منزل پر ہیں لیکن ان کی مقبولیت میں کوئی کمی نہیں آئی ہے۔ اس سال آئی سی سی ورلڈ کپ کے بعد سے ہی دھونی کرکٹ کے میدان سے دور ہیں لیکن ملک میں سب سے زیادہ پسند کیے جانے والے مردوں کی فہرست میں انہوں نے ویراٹ کوہلی اور سچن تندولکر کو پیچھے چھوڑ دیا ہے۔ یوگو کے سروے کے مطابق وزیر اعظم مودی کے بعد ہندوستان میں دھونی سب سے زیادہ پسند کیے جانے والی شخصیات میں دوسرے نمبر پر ہیں۔ اس سروے میں 41 ممالک سے قریب 42 ہزار افراد نے اپنے ووٹ دیئے اور دنیا میں سب سے زیادہ پسند کیے جانے والے مردوں اور عورتوں کے دو زمروں میں اپنے اپنے انتخاب کا اظہارکیا۔ سروے کے مطابق سال2019 میں وزیر اعظم مودی ہندوستان میں سب سے زیادہ پسند کیے جانے اور قابل ستائش شخصیتوں میں نمبر ایک پر ہیں جن کا ووٹ 15.66 فیصد ہے جبکہ خاتون زمرے میں تجربہ کار مکے باز ایم سی میری کوم ہیں۔ مردوں کے زمرے میں وزیر اعظم کے بعد دھونی کا فیصد 8.58 ہے۔ اس کے بعد رتن ٹاٹا (8.02 فیصد)، براک اوباما (7.36 فیصد) اور بل گیٹس (6.96 فیصد) ہیں۔ ہندوستانی کپتان کوہلی اس فہرست میں ساتویں نمبر پر ہیں جن کا فیصد 4.46 ہے۔ کوہلی سے آگے چھٹے نمبر پر سچن تندولکر 5.81 فیصد ہیں۔خواتین کے زمرے میں میری کوم (10.36 فیصد) سب سے آگے ہیں۔
