نئی دہلی۔25 جولائی (سیاست ڈاٹ کام ) آئی سی سی ورلڈ کپ کے دوران چوٹ کی وجہ سے باہر ہو نے والے ہندوستانی کرکٹ ٹیم کے اوپنر شکھر دھون تین اگست کو شروع ہونے والے ویسٹ انڈیز کے دورے کی تیاری میں مصروف ہوگئے ہیں۔ دھون انگلینڈ میں ختم ہوئے ورلڈکپ میں پیٹ کمنس کی گیند سے زخمی ہو گئے تھے، انہیں انگوٹھے میں چوٹ لگی تھی جس کے بعد انہیں ورلڈ کپ کے درمیان میں ہی باہر ہونا پڑا تھالیکن دھون کے تازہ ویڈیو سے ان کی فٹ نیس کے سلسلے میں مثبت اشارے مل رہے ہیں۔دھون نے حال ہی میں ایک ویڈیو سوشل ویب سائٹ انسٹاگرام پر شیئر کیا ہے جس میں وہ نیٹ پر مشق کر رہے ہیں۔ ویڈیو میں وہ کیچ لینے کی پریکٹس کرتے ہوئے نظر آرہے ہیں۔ دھون تین اگست کو شروع ہونے جا رہے ہندوستان کے ویسٹ انڈیز دورے کا حصہ ہیں جہاں انہیں تینوں فارمیٹوں میں شامل کیا گیا ہے۔33 سالہ دھون عالمی کپ کے صرف دو ہی میچوں میں کھیل سکے تھے جس میں انہوں نے ایک میچ میں 117 رنز کی سنچری اننگزکھیلی تھی اور 62.50 کے اوسط سے جملہ 125 رن بنائے تھے۔ایم ایس کے پرساد کی صدارت والی ہندوستانی سلیکشن کمیٹی نے ویسٹ انڈیز کے دورے کے لیے ٹوئنٹی 20، ونڈے اور ٹیسٹ ٹیم کا اعلان کیا ہے جس میں ویراٹ کوہلی کو تینوں فارمیٹس میں کپتانی سونپی گئی ہے اور دھون محدود اوورس کی ٹیموں کا حصہ ہیں۔
