انقرہ : ترکیہ کے صدر رجب طیب اردغان نے مسلح قوتوں کو حکم دیاہے کہ وہ بلا کسی تردداور امتیاز دہشت گردوںکا خاتمہ ممکن بنائیں۔ صدر اردغان نے کابینہ اجلاس کے بعد اپنے بیان میں اس بات کا اظہار کیا اور کہا کہ انسداد دہشت گردی پر مبنی ہماری حکمت عملی سے خطے میں دہشت گردی کی حوصلہ افزائی کرنے والوں میں بے چینی پھیل چکی ہے اور انہوں نے پی کیکے کو اسلحہ، تربیت اور دیگر امدادی مدد کی فراہمی بڑھا دی ہے۔انہوں نے کہا کہ سرحد پار آپریشنز کی بدولت غیر قانونی تارکین وطن کی آمدورفت میں بھی نمایاں کمی واقع ہوئی ہے، سامراجی قوتوں کا شام اور عراق میں دہشت گردی کا مرکز بنانے کا منصوبہ اگر کامیاب ہوگیا تو پورا خطہ عدم استحکام کا شکار ہو جائے گا۔ مزید کہا کہ ہم کسی کی پروا کیے بغیر انسداد دہشت گردی کے حوالے سے نئے اقدامات لیں گے اور جب تک پہاڑی علاقہ دہشت گردی سے پاک نہیں ہو جاتا یہ آپریشنز جاری رہیں گے۔