شارجہ ۔ دہلی کیپٹلز اور راجستھان رائلز کے مابین آئی پی ایل میں جمعہ کو کھیلے جانے والے میچ میں جیت کے ساتھ دہلی ٹیبل میں سرفہرست مقام حاصل کرنے اور راجستھان جیت کی راہ پر واپسی کرنے کے ارادے سے میدان میں اترے گی ۔دہلی پانچ میچوں میں چار فتوحات اور ایک شکست کے بعد ٹیبل پر آٹھ پوائنٹس کے ساتھ دوسرے نمبر پر ہے جبکہ راجستھان پانچ میچوں میں دو فتوحات اور تین شکستوں کے بعد چار پوائنٹس کے ساتھ ساتویں نمبر پر ہے ۔ شارجہ کے چھوٹے گراؤنڈ میں دونوں ٹیموں کے مابین مقابلہ زبردست ہوگا اور میچ کا فیصلہ بڑے اسکور پر مبنی ہوگا۔شارجہ کے گراؤنڈ میں اب تک بہت بڑے اسکور ہوئے ہیں اور اس گراؤنڈ پر پہلی سات اننگز میں200 سے زیادہ کااسکور بنا ہے ۔ دہلی اور راجستھان دونوں نے اس گراؤنڈ پر 200 سے زیادہ کا اسکور حاصل کیا ہے ۔ راجستھان نے اس گراؤنڈ پر216 اور223 رنز بنائے ہیں جبکہ دہلی نے 228 رنز بنائے ہیں جو ٹورنمنٹ کا اب تک کا سب سے زیادہ اسکور ہے ۔دہلی اور راجستھان کا ٹورنمنٹ میں یہ پہلا مقابلہ ہوگا۔ دہلی نے اپنے پچھلے میچ میں رائل چیلنجرز بنگلور کو59 رنز کے بڑے فرق سے شکست دی ہے ۔ بنگلور کومارکس اسٹوینس (ناٹ آؤٹ 53) ، اوپنر پرتھوی شا(42) اور وکٹ کیپر رشبھ پنت (37) اور فاسٹ بولر کیگسو رباداکی جانب سے 24 رنز دے کر 4 وکٹوں کی بدولت یکطرفہ شکست دی تھی ۔دہلی نے 196 رنز بنانے کے بعد بنگلورکو9 وکٹ پر137 رنز تک محدودکردیا تھا۔ دہلی بولنگ اوربیٹنگ دونوں لحاظ سے اچھی کارکردگی کا مظاہرہ کررہی ہے ۔راجستھان کو اپنے آخری میچ میں ممبئی انڈینز کے خلاف پانچ سال کے طویل وقفے کے بعد شکست کا سامنا کرنا پڑا۔ ممبئی نے 193 رنزکا بڑا اسکور بنایا جبکہ راجستھان 18.1 اوورز میں 136 رنز پر ڈھیر ہوگیا۔ راجستھان کے لئے جوس بٹلر نے سب سے زیادہ 70 رن بنائے تھے اور دیگر تمام بیٹسمینس ناکام ہوئے تھے ۔اس شکست کے باوجود راجستھان رائلز کے کپتان اسٹیون اسمتھ نے کہا تھا کہ مسلسل ناکامیوں کے باوجود ٹیم کے حامیوں کو اس وقت گھبرانے کی ضرورت نہیں ہے ۔ اسمتھ نے کہا تھا کہ مجھے نہیں لگتا کہ ہمیں ابھی اتنا گھبرانے کی ضرورت ہے ۔ ہمیں صرف اپنے منصوبے پر عمل کرنے اورطویل عرصے تک اچھی کرکٹ کھیلنے کی ضرورت ہے ۔ ہم پچھلے تین میچوں میں اپنے منصوبوں کے مطابق کارکردگی کا مظاہرہ کرنے میں ناکام رہے ہیں اور ہمیں جلد سے جلد واپس آنا ہوگا۔اسمتھ نے کہا تھا کہ میرے خیال میں ابتدائی وکٹ کھونا ہمارے لئے فائدہ مند نہیں تھا۔ ہمیں پچھلے تین میچوں سے اچھی شروعات نہیں ملی ہے ۔ جوس بٹلر اور جوفرا آرچرکو چھوڑ کر ہمیں بیٹنگ پر توجہ دینے کی ضرورت ہے ۔
