آج دوپہر تہاڑ جیل سے رہائی متوقع ‘ عآپ کیڈر میں زبردست خوشی کی لہر
نئی دہلی :دہلی کے چیف منسٹرٰ اروند کجریوال کو عدالت نے آج بڑی راحت دیتے ہوئے شراب پالیسی اسکام سے منسلک منی لانڈرنگ معاملے میں مستقل ضمانت دینے کا حکم صادر کر دیا ہے۔ ایک لاکھ روپے مچلکہ پر دہلی کے راؤز ایونیو کورٹ نے انھیں ضمانت دینے کا اعلان کیا۔ امید کی جا رہی ہے کہ جمعہ یعنی کل دوپہر کجریوال تہاڑ جیل سے باہر آ جائیں گے۔ای ڈی (انفورسمنٹ ڈپارٹمنٹ) نے چیف منسٹر دہلی کجریوال کو مستقل ضمانت دیے جانے کی مخالفت کیلئے 48 گھنٹہ کا وقت طلب کیا لیکن عدالت نے اپنے فیصلے میں کسی تبدیلی سے انکار کر دیا۔ راؤز ایونیو کورٹ کی تعطیل جج نیائے بندو نے کہا کہ ضمانت کے حکم پر کوئی روک نہیں لگے گی۔ اس معاملے میں اب ای ڈی اونچی عدالت کا رخ کر سکتی ہے۔بہرحال عدالت کے فیصلے کے بعد عام آدمی پارٹی میں زبردست خوشی کا ماحول دیکھنے کو مل رہا ہے۔ پارٹی نے سوشل میڈیا پلیٹ فارم ایکس پر اپنے پوسٹ میں لکھا ہے کہ سچائی پریشان ہو سکتی ہے، شکست نہیں کھا سکتی۔ اس پوسٹ میں یہ بھی لکھا گیا ہے کہ ’’بی جے پی کی ای ڈی کے تمام اعتراضات کو خارج کرتے ہوئے عدالت نے دہلی کے وزیر اعلیٰ چیف منسٹراروند کجریوال کو ضمانت دے دی ہے۔ دہلی حکومت میں وزیر آتشی نے بھی اس تعلق سے ایک پوسٹ کیا ہے جس میں ’ستیہ میو جیتے‘ کیپشن کے ساتھ وزیر اعلیٰ کجریوال کی تصویر لگائی ہے۔واضح رہے کہ دہلی آبکاری معاملہ سے جڑے منی لانڈرنگ کیس کی جانچ کر رہی ای ڈی نے کجریوال کو رواں سال 21 مارچ کو ان کی رہائش گاہ سے گرفتار کیا تھا۔ اس سے پہلے کجریولا کو 9 بار سمن جاری کیا گیا تھا۔ گرفتاری کے بعد کجریوال کئی دنوں تک ای ڈی کی حراست میں تھے۔ اس کے بعد عدالت نے انھیں عدالتی حراست میں بھیج دیا تھا۔ اس درمیان لوک سبھا انتخابی تشہیر کیلئے انھیں عبوری ضمانت ملی تھی۔ پھر 2 جون کو انھوں نے عدالتی ہدایت کے مطابق خود سپردگی کر دی تھی۔ اب انھیں مستقل ضمانت مل گئی ہے تو عآپ لیڈران و کارکنان میں زبردست جوش وخروش دیکھا جارہا ہے۔