نئی دہلی، 10 اگست (یو این آئی) وزیر اعظم نریندر مودی پیر کو دہلی میں اراکین پارلیمنٹ کے لیے نو تعمیر شدہ ٹائپ7 زمرے کے کثیر المنزلہ فلیٹوں کا افتتاح کریں گے ۔یہ فلیٹ بابا کھڑک سنگھ مارگ کے علاقے میں تعمیر کئے گئے ہیں۔ افتتاحی پروگرام صبح 10بجے ہوگا ۔سرکاری ریلیز کے مطابق افتتاحی تقریب کے دوران وزیراعظم کامپلکس میں سندور کا پودا لگائیں گے اور تعمیراتی کارکنوں سے بات چیت بھی کریں گے اور حاضرین سے خطاب بھی کریں گے ۔اس کامپلکس کو رہائش کے نقطہ نظر سے ایک خود کفیل کامپلکس کے طور پر ڈیزائن کیا گیا ہے اور یہ ارکان پارلیمنٹ کی فنکشنل ضروریات کو پورا کرنے کیلئے جدید سہولیات سے آراستہ کیا گیا ہے ۔ گرین ٹیکنالوجی کو شامل کرتے ہوئے ، اس کامپلکس کوگریہہ 3 اسٹار ریٹنگ اور نیشنل بلڈنگ کوڈ (این بی سی) 2016 کے معیارات کے مطابق تیار کیا گیا ہے ۔ کامپلکس کی ماحولیاتی طور پر صحت مند خصوصیات سے توانائی کے تحفظ، قابل تجدید توانائی کی پیداوار اور فضلہ کے موثر انتظام میں تعاون ملنے کی امید ہے ۔جدید تعمیراتی ٹیکنالوجی بالخصوص ایلومینیم شٹرنگ کے ساتھ مونولیتھک کنکریٹ کے استعمال سے منصوبے کی بروقت تکمیل ممکن ہوئی اور ساختی پائیداری بھی یقینی بنی۔ یہ کامپلکس معذور افراد کیلئے بھی موزوں ہے۔یہ منصوبہ اراکینِ پارلیمنٹ کے لیے مناسب رہائش کی کمی کے باعث شروع کیا گیا۔ہر رہائشی یونٹ میں تقریباً 5,000 مربع فٹ کارپٹ ایریا موجود ہے جو رہائشی اور سرکاری دونوں مقاصد کیلئے مناسب جگہ فراہم کرتا ہے ۔ دفاتر، عملے کی رہائش اور کمیونٹی سنٹر کیلئے مخصوص جگہیں اراکینِ پارلیمنٹ کو بطور عوامی نمائندہ اپنی ذمہ داریاں بہتر طور پر ادا کرنے میں مدد فراہم کریں گی۔کامپلکس کی تمام عمارتیں جدید ساختی ڈیزائن کے اصولوں کے مطابق زلزلہ مزاحم تعمیر کی گئی ہیں۔ رہائشیوں کی حفاظت کو یقینی بنانے کیلئے ایک جامع اور مضبوط حفاظتی نظام بھی نافذ کیا گیا ہے ۔
اس موقع پر ریلوے کے وزیر اشونی وشنو اور دیگر معززین بھی موجود تھے ۔
