نئی دہلی: کانگریس نے کہا ہے کہ معیار کو نظر انداز کرتے ہوئے دہلی میں تقریباً ایک درجن بجلی گھروں میں کوئلہ استعمال کیا جا رہا ہے اور مرکز کی نریندر مودی حکومت عوامی صحت پر اس کے مضر اثرات کو روکنے کے لئے کوئی قدم نہیں اٹھارہی ہے ۔ کانگریس نے کہا ہے کہ دہلی میں کوئلے سے چلنے والے 11 پاور اسٹیشن ہیں اور معیار کی خلاف ورزی کرتے ہوئے آلودگی کو بڑھاوا دیا جا رہا ہے اور دہلی کے لوگوں کی صحت کے ساتھ کھلواڑ کیا جا رہا ہے ۔ پارٹی نے کہا کہ اگر مرکز میں کانگریس کی حکومت بنتی ہے تو ان پاور اسٹیشنوں سے ماحولیات کو پہنچنے والے نقصان کو روکنے کے لیے ترجیحی بنیادوں پر اقدامات کیے جائیں گے ۔کانگریس کے میڈیا انچارج جے رام رمیش نے جمعہ کو یہاں پارٹی ہیڈکوارٹر میں ایک پریس کانفرنس میں کہا “دہلی کے انتخابات میں ماحولیات کو ایک خاص مقام حاصل ہے ۔ دہلی کے ماحول کے لیے بنیادی طور پر مرکزی حکومت ذمہ دار ہے کیونکہ دہلی میں آلودگی کا سنگین مسئلہ ہے ۔ اس کا تعلق ہندوستان کی مختلف ریاستوں سے بھی ہے ۔ آج فضائی آلودگی صحت عامہ کے لیے ایک بڑا مسئلہ بن چکی ہے ۔ رمیش نے کہا کہ دہلی کے ارد گرد 11 پاور اسٹیشن ہیں، جن میں کوئلہ استعمال ہوتا ہے ۔ سال 2009 میں تمام پاور اسٹیشنوں کے لیے فضائی آلودگی کے معیارات طے کیے گئے تھے ۔ جن اسٹیشنوں نے ان معیارات پر عمل نہیں کیا انہیں بند کردیا جاتا تھا۔
