نئی دہلی۔7 اپریل (سیاست ڈاٹ کام)دہلی حکومت نے لوک نائک جے پرکاش نارائن اسپتال،جی بی پنت اور راجیو گاندھی سپر اسپیشلٹی اسپتال کو کورونا وائرس کے علاج کیلئے خصوصی اسپتال ہونے کی نشاندہی کرکے کسی بھی قسم کے حالات سے نمٹنے کیلئے پانچ نکات کا منصوبہ تیار کیاہے ۔وزیراعلیٰ کجریوال نے منگل کو میڈیا سے بات چیت میں یہ اطلاع دی ہے ۔کجریوال نے پانچ نکات پر مبنی منصوبے کا انکشاف کرتے ہوئے بتایا کہ منصوبہ ماہرین سے تفصیلی غوروخوض کرنے کے بعد بنایا گیاہے ۔انہوں نے کہا کہ اسے پانچ ٹی’’ٹریسنگ، ٹیسٹنگ ، ٹریٹمنٹ، ٹیم ورک اور ٹریکنگ مانیٹرنگ‘‘کا نام دیا گیا ہے ۔انہوں نے کہا کہ دہلی میں ابھی 525کورونا مریض ہیں۔حکومت نے ان تینوں اسپتالوں کی نشاندہی کورونا وائرس کے علاج کے لئے کی ہے ۔
