نئی دہلی۔28دسمبر(سیاست ڈاٹ کام)قومی دارالحکومت دہلی میں شدید ٹھنڈ میں ہفتے کو مزید اضافہ ہوگیا اور کم از کم درجہ حرارت 1.7ڈگری سیلسیس تک گر جانے سے لوگوں کا ٹھنڈ سے برا حال ہے ۔دہلی میں 14دسمبرسے سرد لہریں چلنے لگی تھیں اور ابھ اگلے تین دنوں تک بنے رہنے کا خدشہ ہے ۔سال 1901کے بعدیہ دوسری بار ہے جب دارالحکومت میں اتنے لمبے وقت تک سرد لہر یں جاری ہیں۔محکمہ موسمیات کے مطابق آج صبح ساڑھے آٹھ بجے سب سے کم درجہ حرارت آیا نگر میں 1.7ڈگری سیلسیس درج کیاگیا جبکہ صفدر جنگ میں درجہ حرارت 2.7اور پالم میں 3.1ڈگری سیلسیس درج کیاگیا۔آج صبح ساڑھے 8 بجے نمی کی سطح 97فیصد درج کی گئی۔محکمے کا خیال ہے کہ 3 جنوری تک پہاڑی علاقوں میں زوردار برفباری ہوگی۔
