حکومت اور انتظامیہ پر مجرمانہ لاپرواہی کا الزام‘غمزدہ خاندانوں سے اظہار تعزیت
نئی دہلی :دہلی کے اولڈ راجندر نگر میں آئی اے ایس کے ایک کوچنگ سنٹر کے بیسمنٹ میں پانی میں ڈوبنے کی وجہ سے ہوئی 3 طلبہ موت پر سخت ردعمل سامنے آ رہا ہے۔ اس واقعہ کی کانگریس کے قومی صدر ملکارجن کھرگے، اپوزیشن لیڈر راہول گاندھی اور کانگریس جنرل سکریٹری پرینکا گاندھی نے سخت مذمت کرتے ہوئے اسے حکومت کی ناکامی اور غیرذمہ دارانہ رویہ قرار دیا ہے۔ ملکارجن کھرگے نے کہا ہے کہ یہ انتہائی افسوسناک ہے کہ حکومت اور انتظامیہ کی مجرمانہ لاپرواہی کی وجہ سے تین نوجوانوں کی جان چلی گئی۔ ان کے خاندان سے ہماری گہری تعزیت۔ انہوں نے کہا ہے کہ اس سے پہلے ایک اور یو پی ایس سی امیدوار کی پٹیل نگر میں پانی بھر جانے کی وجہ سے بجلی کا کرنٹ لگنے سے موت ہوگئی تھی۔ اطلاعات کے مطابق گزشتہ چند دنوں میں بجلی کا کرنٹ لگنے سے 8 افراد جان کی بازی ہار چکے ہیں۔ملکارجن کھرگے نے کہا ہے کہ کانگریس نے دہلی کو بین الاقوامی سطح کا شہر بنایا تھا۔ آج ہندوستان کا دارالحکومت بے حسی کا شکار ہے۔ آئے روز حادثات ہوتے رہتے ہیں۔ ملک کے دارالحکومت میں اس قسم کا حادثہ رونما ہونا ہم سب کے لیے انتہائی تشویشناک ہے۔ راہول گاندھی نے اس دلدوز واقعے کو نظام کی مشترکہ ناکامی قراردیتے ہوئے عمارت کے بیسمنٹ میں پانی بھر جانے سے مقابلہ جاتی امتحان میں شرکت کرنے والے طلباء کی موت انتہائی افسوسناک ہے۔ انہوں نے تمام سوگوار خاندانوں سے دلی تعزیت کا اظہارکیا۔راہول گاندھی نے کہا کہ غیر محفوظ تعمیرات، ناقص ٹاؤن پلاننگ اور ہر سطح پر اداروں کی غیرذمہ دارانہ رویے کی قیمت عام شہری اپنی زندگی گنوا کر چکا رہا ہے۔ انہوں نے کہا ہے کہ محفوظ اور سہولیات کے ساتھ زندگی ہر شہری کا حق اور حکومتوں کی ذمہ داری ہے۔ پرینکا گاندھی نے بھی اس واقعے پر اپنے شدید ردعمل کا اظہار کرتے ہوئے کہا ہے کہ کوچنگ سنٹر کے بیسمنٹ میں پانی بھرنے سے تین طالب علموں کی موت کا واقعہ دل کو دہلا دینے والا ہے۔ انہوں نے کہا ہے کہ یہ غفلت اور بدانتظامی کی انتہا ہے کہ جو بچے اپنے خوابوں کو پورا کرنے کے لیے یہاں آتے ہیں ان کی زندگیاں ان سے چھن رہی ہیں ۔اس کا احتساب ہونا چاہیے۔واضح رہے کہ دہلی کے اولڈ راجندر نگر میں راؤ آئی اے ایس اسٹڈی سنٹر کے بیسمنٹ میں پانی بھر جانے سے ایک بڑا حادثہ پیش آیا۔ کوچنگ سنٹر میں قیام پذیر 3 طالب علموں کی پانی میں ڈوبنے سے موت ہو گئی۔