نئی دہلی : کانگریس قائد راہول گاندھی نے آج ہریدوار میں وزیر اعظم نریندر مودی کو ایک بار پھر سخت تنقید کا نشانہ بنایا ۔ ہریدوار میں اپنی ایک تقریر کے دوران انھوں نے کہا کہ ’’کانگریس آپ لوگوں کی حکومت لائے گی۔ دہلی میں وزیر اعظم نہیں ہیں، وہاں راجہ بیٹھا ہوا ہے۔ ہمیں ایسی حکومت نہیں چاہیے۔ راہول نے کہا کہ ’’اگر ہماری حکومت آتی ہے تو ہم ریاست میں 4 لاکھ ملازمتیں دیں گے۔ 5 لاکھ غریبوں کو ہر سال 40 ہزار روپے ان کے اکاونٹ میں ڈلوائیں گے۔ ایمبولنس، موٹر سائیکل اور ڈرون کے ذریعہ سے صحت خدمات کو آپ کے گھر تک پہنچائیں گے۔ راہولگاندھی نے مودی کی طرز حکمرانی کو بھی تنقید کا نشانہ بنایا۔ انھوں نے کہا کہ اگر نریندر مودی کو لگتا ہے کہ ان سے سبھی کو ڈر لگتا ہے، تو وہ غلط ہیں۔ ان کو لگتا ہے کہ ای ڈی، سی بی آئی سے وہ کسی کو بھی دبا دیں گے، تو وہ غلط ہیں۔ مجھے ان سے ڈر نہیں لگتا۔ مجھے الٹا ان کے تکبر کو دیکھ کر ہنسی آتی ہے۔ وہ ملک سے کہتے ہیں کہ گزشتہ 70 سالوں میں کچھ نہیں ہوا۔ ایسا لگتا ہے جیسے یہ سڑکیں، فیکٹری، ٹرین سب جادو سے بنی ہیں۔