نئی دہلی: عام آدمی پارٹی نے کہا کہ دہلی میں پہلی بارش میں بی جے پی حکومت کے چاروں انجن بیکار ثابت ہوئے اور منٹو روڈ، آئی ٹی او، دھولا کنواں، دہلی ایئرپورٹ، پرانا راجندر نگر سمیت دہلی کے کئی علاقوں کی سڑکیں پانی میں ڈوب گئیں۔ عام آدمی پارٹی کے دہلی کے ریاستی صدر سوربھ بھاردواج، سینئر لیڈر منیش سیسودیا، ایم پی سنجے سنگھ، اپوزیشن لیڈر آتشی اور جیسمین شاہ کے ساتھ دیگر لیڈروں نے ایکس پر دہلی کے مختلف علاقوں میں پانی جمع ہونے کا ویڈیو شیئر کیا۔ عام آدمی پارٹی نے پانی بھرنے کا ویڈیو اور تصاویر شیئر کرتے ہوئے کہا کہ بی جے پی کی تباہی والی حکومت میں اب سڑکوں پر نالے بہہ رہے ہیں۔ جمعرات کی رات ہونے والی بارش سے سڑکیں اور گلیاں پانی میں ڈوب گئیں اور کئی بے گناہ لوگوں کی جانیں گئیں۔ بی جے پی حکومت نے ملک کی راجدھانی دہلی کو برباد کرنے میں کوئی کسر نہیں چھوڑی ہے ۔ بھاردواج نے ’ایکس‘ پر کہاکہ پہلی بارش میں 4 لوگوں کی موت ہوئی، ایک ماں اور اس کے تین بچے ۔ دہلی کی چار انجن والی حکومت کا سچ آج سب کے سامنے ہے ۔ 4 کی موت، دہلی-این سی آر میں شدید بارش اور مٹی کے طوفان سے فلائٹ آپریشن متاثر۔ عام آدمی پارٹی کے سینئر لیڈر اور پنجاب کے انچارج منیش سسودیا نے ’ایکس‘ پر کہاکہ بی جے پی کے دور حکومت میں دہلی کی حالت دیکھیں۔ ٹرپل انجن والی حکومت کے تمام انجن اور ان کے پرزے صبح سے شام تک اروند کیجریوال کے خلاف شور مچانے میں مصروف تھے اور دہلی کو ایسی حالت میں بنا دیا ہے ۔
سنگھ نے کہاکہ بی جے پی ہی تباہی کی ضمانت ہے ۔ میں کہتا رہتا ہوں کہ بی جے پی کے سارے انجن بیکار ہو گئے ہیں۔ دہلی میں تین انجن والی حکومت کی حالت دیکھیں، پہلی بارش میں ہی سڑکیں پانی سے بھر جاتی ہیں۔
بی جے پی نے بہت کم وقت میں دہلی کو برباد کرنے کا ریکارڈ بنا دیا ہے ۔
اپوزیشن لیڈر آتشی نے ’ایکس‘ پر ایک ویڈیو پوسٹ کیا اور کہا کہ یہ دہلی میں پہلی بارش کے بعد دھولا کنواں اور دہلی ایئرپورٹ کے آس پاس کے علاقوں سے لی گئی تصاویر ہیں۔ کیا دہلی کے عوام کو چار انجن والی بی جے پی حکومت سے یہی امید تھی؟
