بل، پارلیمنٹ کے دائرہ اختیار سے باہر : کانگریس۔ دیگر اپوزیشن بھی مخالف
نئی دہلی: اپوزیشن کے احتجاج کے درمیان آج لوک سبھا میں دہلی کے تین کارپوریشنوں کو ضم کرنے کے مجوزہ بل پیش کیا گیا۔وزیر مملکت برائے داخلہ نتیانند رائے نے دہلی میونسپل کارپوریشن (ترمیمی) بل 2022پیش کرتے ہوئے کہا کہ اس بل کی منظوری سے دہلی کے بلدیاتی نظام میں یکسانیت آئے گی، پالیسیاں ٹھوس ہوں گی اور ملازمین کی تنخواہوں کی ادائیگی جیسے مسائل حل ہوں گے ۔ انہوں نے کہا کہ یہ بل دہلی والوں کے مفاد میں ہے ۔کانگریس اور ریوولیوشنری سوشلسٹ پارٹی اور بہوجن سماج پارٹی نے بل کی مخالفت کرتے ہوئے کہا کہ یہ حکمراں پارٹی کی طرف سے قومی دارالحکومت میں بلدیاتی انتخابات کو ملتوی کرنے کی سازش ہے ۔عام آدمی پارٹی نے بھی اس بل کی مخالفت کی ہے ، حالانکہ پارٹی کے رکن اسمبلی بھگونت مان چیف منسٹر پنجاب بننے کے بعد پارٹی کا ایوان میں کوئی رکن نہیں ہے ۔
