نئی دہلی: دہلی ہائی کورٹ نے قومی راجدھانی کی شراب پالیسی2021-22 جسے بعد میں منسوخ کر دیا گیا تھا۔ اس میں مبینہ بے ضابطگیوں کے سلسلے میں مرکزی تفتیشی بیورو کی طرف سے درج کی گئی ایف آئی آر کے معاملے میں دہلی کے سابق نائب وزیر اعلیٰ منیش سیسوڈیا کی ضمانت کی عرضی منگل کے روز مسترد کر دی ۔جسٹس دنیش کمار شرما کی سنگل بنچ نے عام آدمی پارٹی لیڈر کی عرضی کو مسترد کرتے ہوئے کہا کہ عرضی گزار ایک بااثر شخص ہے اور ضمانت ملنے کے بعد گواہوں کو متاثر کرسکتا ہے ۔ اس وجہ سے اسے ضمانت نہیں دی جا سکتی۔راوس ایونیو میں واقع ایم کے ناگپال کی خصوصی عدالت نے 31 مارچ کو سیسوڈیا کو ضمانت دینے سے انکار کر دیا تھا۔ اس کے بعد انہوں نے دہلی ہائی کورٹ سے رجوع کیا تھا۔خصوصی عدالت نے 28اپریل کو انفورسمنٹ ڈائریکٹوریٹ کے ذریعہ منی لانڈرنگ سے متعلق ایف آئی آر میں سیسوڈیا کی ضمانت کی درخواست مسترد کردی تھی۔ سیسوڈیا کو سی بی آئی نے طویل پوچھ گچھ کے بعد 26 فروری 2023 کو گرفتار کیا تھا۔ وہ فی الحال ای ڈی اور سی بی آئی کے ذریعہ درج کیس میں عدالتی تحویل میں تہاڑ جیل میں قید ہیں۔
فوج اور فضائیہ کی مشترکہ مشق
چنڈی گڑھ: پنجاب میں 11 سے 27 مئی تک ایک بڑی تربیتی مشق کا انعقاد کیا گیا۔یہ مشق انبالہ میں واقع کھڑگا کور کی مختلف یونٹوں اور فارمیشنوں نے کی تھی۔ زمینی افواج کی مدد کیلئے اٹیک، ہیلی کاپٹروں کی تعیناتی، رکاوٹ مخالف نظاموں میں گہری کارروائیاں، ہائی ٹیک ڈرونز کا بطور فورس ضرب، دشوار گزار علاقوں میں لڑائی جیسی مشقیں کی گئیں۔