نئی دہلی ۔13؍ستمبر ( ایجنسیز )دہلی میں بم دھماکہ کی دھمکیاں مستقل ملنے سے پولیس محکمہ میں تشویش کا ماحول ہے۔ کل دہلی ہائی کورٹ احاطہ میں بم دھماکہ کی دھمکی ملی تھی جو بعد میں فرضی ثابت ہوئی اور اب تاج پیالس کو بم سے اڑانے سے متعلق دھمکی آمیز ای میل نے پورے علاقہ میں ہلچل پیدا کر دی ہے۔ دھمکی ملنے کے بعد سیکورٹی ایجنسیاں الرٹ ہو گئی ہیں اور تحقیقات بھی شروع کر دی گئی ہے۔میڈیا رپورٹس کے مطابق تاج پیلیس کو دھمکی آمیز ای میل موصول ہوا ہے جس میں بم دھماکہ کی بات کہی گئی ہے۔ اس دھمکی کے بعد پولیس فوراً موقع پر پہنچی اور جانچ شروع کر دی۔ دھمکی ملنے کے بعد تاج پیالس کے آس پاس بھی سیکورٹی بڑھا دی گئی ہے۔ جانچ کے دوران فی الحال کسی بھی طرح کا مشتبہ سامان برآمد نہیں ہوا ہے جس سے یہ دھمکی بھی فرضی ثابت ہوئی ہے۔ پولیس نے بتایا کہ ای میل بھیجنے والے کی شناخت کی جا رہی ہے اور اس کے خلاف سخت کارروائی کی جائے گی۔قابل ذکر ہے کہ 12 ستمبر کو دہلی ہائی کورٹ میں بم دھماکہ کرنے کی دھمکی دی گئی تھی۔ دھمکی ملتے ہی عدالتی احاطہ کو فوراً خالی کروایا گیا تھا اور ججوں کے ساتھ ساتھ وکیلوں کو بھی بہ حفاظت باہر نکالا گیا تھا۔ بعد ازاں اینٹی بم اسکواڈ نے پورے عدالتی احاطہ کی تلاشی کی لیکن کوئی بھی مشتبہ سامان برآمد نہیں ہوا۔ اس دھمکی نے وکیلوں اور ملازمین کے درمیان خوف کا ماحول بنا دیا تھا۔ بہرحال پولیس نے ہائی کورٹ احاطہ میں سیکورٹی انتظام کومزید سخت کر دیا ۔ سیکورٹی فورسز کی تعداد بھی بڑھا دی گئی ہے تاکہ کسی بھی ممکنہ خطرے کا سامنا کیا جا سکے۔ چند دن قبل دہلی کے کئی اسکولس کو بھی بم سے اڑانے کی دھمکیاں مل چکی ہیں تاہم پولیس کی تلاشی کے بعد یہ تمام افواہ ثابت ہوئیں۔
