نئی دہلی ۔24؍اگست ( ایجنسیز) ڈیفنس ریسرچ ڈیولپمنٹ آرگنائزیشن کی جانب سے اندرون ملک تیار کیے گئے ایئر ڈیفنس سسٹم کے تحت پہلی بار کامیاب تجربات کیے گئے ہیں اور اس کو ملک کے دفاع کیلئے سنگ میل قرار دیا ہے۔میڈیا کے مطابق یہ تجربات ہفتہ کو دن تقریباً ساڑھے بارہ بجے اوڈیشہ کے ساحل پر کیے گئے۔ وزیر دفاع راجناتھ سنگھ نے اس کا اعلان اپنے ایکس اکاؤنٹ کے ذریعے کیا اور تصویر بھی شیئر کی۔انہوں نے لکھا کہ ہندوستان نے انٹگریٹڈ ایئر ڈیفنس سسٹم کے ذریعے کامیابی سے تجربات مکمل کر لیے ہیں جس پر انہوں نے ڈیفنس ریسرچ ڈیولپمنٹ آرگنائزیشن اور مسلح افواج کو مبارک باد دی۔ڈیفنس ریسرچ اینڈ ڈیولپمنٹ آرگنائزیشن کی جانب سے ٹیسٹ کی ویڈیو سوشل میڈیا پر شیئر کی گئی ہے۔اس کے ساتھ لکھا گیا ہے کہ ’یہ ایک ملٹی لیئرڈ فضائی دفاعی نظام ہے جس میں مقامی طور پر تیار ہونے والا سامان استعمال کیا گیا ہے جن میں فوری ردعمل کے آلات کے علاوہ میزائلز اور ایک انتہائی طاقتور لیرز ہتھیار بھی شامل ہے۔راجناتھ سنگھ کا کہنا ہے کہ ’یہ کامیاب تجربات ملک کی دفاعی ٹیکنالوجی اور خودانحصاری کی طرف اہم قدم ہے اس سے دشمنوں کے خلاف ہمارے ملک کا دفاعی نظام مضبوط ہوا ہے۔حکام کا کہنا ہے کہ کثیر سطحی فریم ورک رکھنے والا یہ نظام سائبر سکیورٹی کے علاوہ نگرانی کے دوسرے طریقہ ہائے کار کے ساتھ ساتھ شہریوں اور انفراسٹرکچر کی حفاظت کو یقینی بنانے میں مدد سے گا۔
