بستی:وزیر اعظم نریندر مودی نے اتوار کے روز ملکیت اسکیم کا افتتاح کرتے ہوئے کہا کہ یہ اسکیم خاص طور پر پروانچل کے 38 اضلاع کے لئے تحفہ ثابت ہوگا۔ مودی نے اتوار کو دہلی میں ملکیت اسکیم کا افتتاح کیا۔ ضلع بستی میں ویڈیو کانفرنسنگ کے ذریعہ انہوں نے کہا کہ دیہات کی زمین کے درست ریکارڈ کی وجہ سے گرام پنچایتوں میں تعمیر کیے جانے والے اسکولوں، دواخانوں ، پبلک بیت الخلاء وغیرہ کا کام تنازعات سے پاک اور تیز رفتاری سے کیا جاسکتا ہے ۔ اس کے ساتھ ہی دیہات کی ترقی بھی تیز تر ہوگی۔انہوں نے کہا کہ مستقبل میں ہر گرام پنچایت کا کام آن لائن اور جیو ٹیگنگ کے ساتھ شفافیت کے ساتھ کیا جائے گا۔ یہ اسکیم اتر پردیش کے پوروانچل کے 38 اضلاع کے لئے تحفہ ہوگا۔ تحصیل صدر کے دولت پور گاؤں کے پرائمری اسکول کے کیمپس میں کنچن پور گاؤں کے لوگوں کو سی آر او نیتایادو نے گھرؤنی کا سرٹیفکیٹ دیا۔مسٹر مودی نے کہا کہ اس اسکیم کا مقصد دیہی آبادی کے علاقے کی حد بندی کرنا ہے ۔ اس کی تکمیل پر غیر منقسم دیہی آبادی کا ایک درست ریکارڈ تیار کیا جائے گا۔ اس کام میں پنچایتی راج ڈپارٹمنٹ ، محکمہ ریونیو ، سروے ڈپارٹمنٹ کے اشتراک سے ڈرون سروے تکنیک کا استعمال کرتے ہوئے صحیح صحیح گھرؤنی تیار کی گئی ہے ۔