لکھنؤ : بہوجن سماج پارٹی کی سربراہ مایاوتی نے ہفتہ کو ایک بار پھر ذات پر مبنی مردم شماری کا مطالبہ دوہرایا۔ مایاوتی نے کہا کہ اب یہ ضروری ہو گیا ہے کہ مرکزی حکومت اس معاملہ پر بغیر کسی تاخیر کے مثبت قدم اٹھائے۔ انہوں نے ہفتہ کو ایکس پر لکھا کہ 4 دسمبر سے شروع ہونے والے پارلیمنٹ کے آئندہ سرمائی اجلاس سے پہلے کل جماعتی اجلاس میں بی ایس پی نے حکومت سے ملک میں ذات پر مبنی مردم شماری کرانے کا مطالبہ کیا۔ اب جب ملک کے کونے کونے سے اس کا مطالبہ کیا جا رہا ہے تو مرکزی حکومت کے لیے ضروری ہو گیا ہے کہ وہ اس سلسلے میں فوری مثبت قدم اٹھائے۔ انہوں نے مزید لکھا کہ مہنگائی، غربت، بے روزگاری، خراب سڑکوں، پانی، بجلی، تعلیم، صحت اور امن و امان اور ذات پات کے استحصال اور مظالم کا شکار ملک کے عوام میں ذات پر مبنی مردم شماری کے حوالے سے جو بے مثال دلچسپی اور شعور بیداری پیدا ہوئی ہے اس سے بی جے پی کی نیند حرام ہوگئی ہیں۔
