گوہاٹی ۔ 20 ڈسمبر (ایجنسیز) آسام میں راجدھانی ایکسپریس ایک ہاتھیوں کے جھنڈ سے ٹکرا گئی جس کے نتیجے میں کم از کم آٹھ ہاتھی ہلاک اور ایک ہاتھی کا بچہ زخمی ہو گیا۔ میڈیا کے مطابق حادثہ کے بعد ٹرین کی انجن سمیت 5 بوگیاں پٹری سے اتر گئیں تاہم کسی مسافر کے زخمی ہونے کی اطلاع نہیں ہے۔ ریلوے حکام کے مطابق یہ حادثہ تقریباً گزشتہ رات 2 بج کر 17 منٹ پر پیش آیا جب ٹرین آسام کے ہوجائی علاقہ سے گزر رہی تھی۔ اس دوران ہاتھیوں کا ایک جھنڈ اچانک ریلوے پٹری پر آ گیا، پائلٹ نے ہاتھیوں کو بچانے کے لیے ایمرجنسی بریک لگائی لیکن تیز رفتاری کے سبب ٹرین ہاتھیوں سے ٹکرا گئی۔ میڈیا کا کہنا ہے کہ جنگلاتی محکمہ کے افسران نے تصدیق کی ہے کہ حادثہ میں 8 ہاتھی ہلاک ہوئے جبکہ ایک زخمی بچہ کو بچا لیا گیا ہے۔