جے پور۔ بھارتیہ جنتا پارٹی (بی جے پی) نے راجستھان میں کانگریس حکومت کے تین سال مکمل ہونے پر ‘جنگل راج کے تین سال’ کے ہیش ٹیگ سے ٹویٹر پر ایک مہم شروع کی ہے ۔ بی جے پی کے ریاستی صدر ڈاکٹر ستیش پونیا نے ٹویٹ کرکے اس مہم کا آغاز کیا۔ اس موقع پر ڈاکٹر پونیا نے کہا کہ مہنگائی، بدعنوانی اور جرائم گہلوت حکومت کے تین سالہ دور اقتدار کے تین دھبے ہیں۔ اسی طرح پارٹی کی قومی نائب صدر اور سابق وزیر اعلیٰ وسندھرا راجے نے ٹویٹ کیا کہ سات دہائیوں میں یہ پہلا موقع ہے کہ ریاست میں حکومت کہیں نظر نہیں آ رہی ہے ۔ ان تین سالوں میں کانگریس کی گہلوت حکومت راجستھان کے عوام سے اوجھل ہوگئی ہے ۔ عوام سے جھوٹے وعدے کرکے بننے والی یہ حکومت عوام کے ہر امتحان میں مکمل طور پر ناکام ہورہی ہے ۔ راجے نے کہا کہ اگر ریاست میں حکومت ہوتی تو لاء اینڈ آرڈر(امن عامہ) ختم نہ ہوتا اور دلتوں پر مظالم میں اضافہ نہ ہوتا۔ راجستھان مہنگائی کی آگ میں نہیں جھلستا ’نہ ہی مہنگائی میں ملک میں نمبرون ہوتا۔ اتنے نہیں، بجلی، پٹرول اور ڈیزل کی قیمتیں بھی یہاں ملک میں سب سے زیادہ نہیں ہوتیں۔ انہوں نے کہا کہ کہنے کو یہ حکومت تین سال مکمل کرنے جارہی ہے لیکن ان تین سالوں میں کرپشن نے کئی ریکارڈ قائم کیے ہیں اور کورونا کے دوران افراتفری سے ریکارڈ اموات ہوئی ہیں۔ جھوٹے وعدوں پر بننے والی یہ حکومت ہر میدان میں ناکام ہو رہی ہے ۔
