راجوری: جموں و کشمیر کے راجوری ضلع کے کنڈی علاقہ میں انکاونٹر میں فوج کے پانچ جوان شہید ہوگئے ہیں۔ ایک زخمی جوان کی حالت سنگین بتائی جارہی ہے۔ آپریشن کے دوران تین جوان زخمی ہوگئے تھے۔ علاقہ میں فوج کا آپریشن ابھی بھی جاری ہے۔ احتیاط کے طور پر علاقہ میں انٹرنیٹ خدمات بھی بند کردی گئی ہے۔ جمعہ کو سیکورٹی فورسیز اور دہشت گردوں کے درمیان انکاونٹر شروع ہوا ، جس میں ایک افسر سمیت چار جوان زخمی ہوگئے تھے۔ زخمی جوانوں کو کمانڈ ہاسپٹل ادھم پور لے جایا گیا۔ راجوری ضلع کے بنیاری پہاڑی علاقہ کے ڈوک میں گولہ باری ہوئی۔ اے ڈی جی پی جموں زون مکیش سنگھ نے تصدیق کی کی کنڈی جنگلاتی علاقہ میں انکاونٹر جاری ہے۔ راجوری ضلع کے کنڈی ٹولے کے کیسری علاقہ میں دہشت گردوں اور سیکورٹی فورسیز کے درمیان مڈبھیڑ ہوئی ہے۔ ذرائع کے مطابق راجوری انکاونٹر میں اب تک دو دہشت گرد مارے جاچکے ہیں۔ کئی دہشت گردوں کے گھرے ہونے کی خبریں مل رہی ہیں۔ دہشت گرد دو گروپ میں ہیں۔ ڈی جی پی دلباغ سنگھ بھی جائے واقعہ پر پہنچنے والے ہیں۔ ڈی جی پی نے بتایا کہ پولیس، فوج اور سی آر پی ایف کی ایک مشترکہ ٹیم نے علاقہ میں دہشت گردوں کی موجودگی کی خاص اطلاع ملنے پر محاصرہ کیا اور تلاشی مہم چلائی۔