نئی دہلی: راجیہ سبھا کی کارروائی کے دوران سماج وادی پارٹی کی رکن پارلیمنٹ جیا بچن اور چیئرمین جگدیپ دھنکر کے درمیان گرما گرم بحث ہوئی۔ جیا بچن نے جگدیپ دھنکر پر الزام لگاتے ہوئے کہا کہ آپ کا لہجہ ٹھیک نہیں ہے جیا بچن نے کہا کہ میں ایک فنکار ہوں۔ میں باڈی لینگویج سمجھتی ہوں۔ میں اظہار کو سمجھتی ہوں۔ انہوں نے کہا کہ میں معذرت خواہ ہوں لیکن آپ کا لہجہ ٹھیک نہیں ہے۔ یہ قابل قبول نہیں ہے۔ جیا بچن کے تبصرے پر جگدیپ دھنکر بھی ناراض ہوگئے اور انہیں آداب سیکھنے کا مشورہ دیا۔ ہنگامہ اس قدر بڑھ گیا کہ اپوزیشن ارکان نے ایک ساتھ ایوان سے واک آؤٹ کیا اور ‘دادا نہیں چلے گا’ کے نعرے لگائے۔جیا بچن نے کہا کہ چیئرمین بار بار چیمبر میں کیوں فون کرتے ہیں۔ وہ ایوان میں بھی بات کر سکتے ہیں۔ اپوزیشن ارکان پارلیمنٹ کے ساتھ ان کا رویہ اچھا نہیں ہے اور وہ غلط انداز میں بات کرتے ہیں۔جیسے ہی جگدیپ دھنکھر نے جیا بچن کو مشہور شخصیت کہا، اپوزیشن کے ارکان نے فوراً اس پر اعتراض کیا۔ انہوں نے کہا کہ جیا بچن پارلیمنٹ کی سینئر رکن ہیں تو آپ انہیں سیلیبریٹی کیسے کہہ سکتے ہیں۔ بحث کے دوران تمام اپوزیشن ارکان نعرے لگاتے ہوئے ایوان سے واک آؤٹ کر گئے۔
