نئی دہلی : راجیہ سبھا نے آج ملک کی عظیم سپرنٹر اور نامزد رکن پی ٹی اوشا کو انڈین اولمپک ایسوسی ایشن کا صدر بننے پر مبارکباد دی۔چیئرمین جگدیپ دھنکر نے پیر کو ایوان کی کارروائی کا آغاز کرتے ہوئے کہا کہ اڑن پری کے نام سے مشہورپی ٹی اوشا کو 10 دسمبر کو انڈین اولمپک اسوسی ایشن کی پہلی خاتون صدر منتخب کیاگیا ہے ۔ انہوں نے کہا کہ وہ اس عہدے پر فائز ہونے والی پہلی اولمپیئن ہیں اور پورے ایوان کی جانب سے پی ٹی اوشا کو مبارکباد دیتے ہیں۔چیئرمین نے کہا کہ پی ٹی اوشا نے صرف 20 سال کی عمر میں لاس اینجلس میں منعقدہ 1984کے اولمپک گیمز میں اپنی شاندار کارکردگی سے ملک کا نام روشن کیا۔ اس کے بعد انہوں نے ایشین چیمپئن شپ میں بھی شاندار کارکردگی کا مظاہرہ کیا۔ انہوں نے کہا کہ پی ٹی اوشا کو ان کی بہترین کارکردگی پر ارجن ایوارڈ اور پدم شری ایوارڈ سے نوازا گیا ہے ۔
